Заклучно со 24 октомври, според ИЈЗ, во Република Северна Македонија се регистрирани вкупно 1 148 случаи на голема кашлица, со инциденца од 62,5 на 100 000 жители
Десет нови случаи на голема кашлица се пријавени во периодот од 18 до 24 октомври, што е за 42,9 проценти повеќе во споредба со претходниот седумдневен период, соопшти денеска попладне Институтот за јавно здравје (ИЈЗ), од каде што велат дека три лица од новорегистрираните случаи се хоспитализирани.
Најголем број новозаболени од голема кашлица, односно пет се пријавени во Куманово, четири се во Скопје и еден во Крива Паланка.
Возраста на заболените, според извештајот на ИЈЗ, се движи од два месеца до 70 години, а најголем дел од случаите припаѓаат на возрасната група до четири години.
Кога станува збор за вакциналниот статус на заболените, седуммина биле невакцинирани, некомплетно вакцинирани или со непознат вакцинален статус, две лица биле вакцинирани согласно возраста и еден случај комплетно вакциниран.
Заклучно со 24 октомври, информираат од Институтот, во Република Северна Македонија се регистрирани вкупно 1 148 случаи на голема кашлица, со инциденца од 62,5 на 100 000 жители.
„Тоа претставува неколкукратно зголемување на бројот на заболени во однос на изминатиот петгодишен период од 2019 до 2023 година, кога се регистрирани вкупно 10 случаи“,
велат од ИЈЗ.
Дистрибуцијата по пол покажува дека од заболените 523 лица се од машки, а 625 од женски пол.
Од вкупниот број заболени лица, кај 1 139 лица биле регистрирани симптоми, додека болеста кај деветмина била во асимптоматска форма.
Од вкупниот број регистрирани случаи, 726 не биле вакцинирани, не се комплетно вакцинирани согласно возраста или нема доказ за вакцинација. Од случаите што се комплетно вакцинирани, просек на поминато време од последната доза на вакцина до заболување изнесува 11 години.
Од 18 јануари до 24 октомври годинава, според Институтот за јавно здравје, дадени се вкупно 78 096 дози вакцина со компонента против голема кашлица.