Утрешното „збогување“ со овој парламентарен состав моментно се чини поизвесно од донесувањето на законот за ЈО, за кој се уште се бара поддршка од пратеник „плус“
Владејачкото мнозинство, според партиски извори, е многу блиску до обезбедување на потребните 80 гласа за донесување на законот за јавно обвинителство.
Според последните информации, моментно недостига само уште еден глас за мнозинството да биде посигурно и да се обезбеди порелаксирана атмосфера утре претпладне, кога ќе се гласаат двотретинските закони за ЈО и за одбрана. Во претходните денови, како што објавивме, недостигаа повеќе гласови, но, по низа политички маневри во изминатите денови, според информациите, обезбедена е дополнителна поддршка за законот за ЈО.
Утрешниот ден, иако е недела, би требало да биде последен работен на овој парламентарен состав, затоа што точно напладне е закажана седница за самораспуштање на пратениците. Во агендата на Собранието, всушност, се продолженија на две седници (едната за законите за обвинителството, а другата за законот за одбрана). Третата седница е планирана како последна во овој парламентарен состав, така што единствена точка на дневниот ред е предлогот на спикерот Талат Џафери за распуштање на Собранието, со цел одржување избори на 12 април, согласно со политичкиот договор од октомври.
Ќе се гласа во секој случај
Законот за одбрана, кој се прилагодува кон стандардите на НАТО, според проценките во парламентот, не е „проблематичен“, затоа што за негово донесување може да се обезбедат 80 гласа и без ВМРО-ДПМНЕ. Затоа, пак, исходот за законот за ЈО и натаму е за „трошка“ неизвесен. Од тоа колку ќе се одолговлечат преговорите за обезбедување 80 гласа, според проценките во парламентот, зависи како ќе одвива и седницата за распуштање во парламентот, барем што се однесува до тајмингот кога „навистина“ ќе стартува расправата.
Партиски извори најавуваат дека законот за ЈО, во секој случај, утре ќе биде ставен на гласање. Ако биде донесен, тоа ќе значи исполнување на еден од неформалните услови на ЕУ, пред следните одлуки во однос на почетокот на преговорите за нашата земја. Во случај, пак, да не биде донесен, како што велат од СДСМ, барем ќе излезе на чистина кои политички субјекти навистина се вложуваат во исполнување на обврските од евроатлантската агенда.
Иако причината поради која во октомври минатата година беа договорени вонредните парламентарни избори, сега е делумно надмината, со оглед на последните позитивни сигнали во однос на почетокот на преговорите со ЕУ, извори од СДСМ тврдат дека е извесно и утрешното распуштање на парламентот. И иако генералниот секретар на СДСМ Љупчо Николовски најави можност за формирање ново парламентарно мнозинство и редовни избори (ако не бидат ставени на гласање клучните закони), од СДСМ велат дека веќе не е доведен во прашање договорениот изборен термин – 12 април.
Историјат
За распуштање на парламентот се потребни најмалку 61 глас. Очекуваното распуштање на деветтиот парламентарен состав, ќе биде петти ваков чин во историјата на плурализмот на земјава, откако од 2008 година досега вонредни парламентарни избори станаа редовна практика во земјава.
Веднаш по распуштањето на парламентот, можеби уште утре или најдоцна в понеделник, спикерот Џафери треба да ги распише десеттите парламентарни избори. Од тој момент ќе почнат да течат роковите за спроведување на изборните дејствија, но и ограничувањата за нови вработувања, тендери, субвенции…во државните институции.