Неизвесни, според партиски извори, се гласовите на двајца независни пратеници и на пратениците на Беса и на Алијанса за Албанците
Недостигаат гласови за донесување на законот за јавно обвинителство. Според извори од раководството на СДСМ, тоа е причината поради која се одолговлекува почетокот на собраниската седница, на која треба да почне расправата за законите за јавно обвинителство, за чие донесување се потребни најмалку 80 гласа и за законот за Совет на јавни обвинители, кој не е двотретински, ама е поврзан со планираната реформа во Обвинителството за гонење организиран криминал.
Извори од СДСМ за „360 степени“ велат дека бројката на гласови што недостигаат не е за потценување и прашање е дали овој пат сите пратеници што гласаа за прогласување на уставните измени ќе бидат „за“ и за законот за ЈО. Според информациите, проблематичен е гласот на Панчо Минов, кој влезе во парламентот од редовите на ГРОМ. За Елизабета Канческа-Милевска од независната пратеничка група, пак, од претходно беше извесно дека нема да гласа за овој закон. Неизвесна е и поддршката од пратениците од опозициските Алијанса за Албанците и на Беса, кои заедно имаат пет пратеници, иако се остава простор на крај да дадат поддршка.
Сурија Рашиди од Алијанса и Панчо Минов се единствените пратеници кои во Комисијата за европски прашања поднесоа по еден амандман за законот за ЈО. Амандманите што се однесуваа на членот 110, кој предвидува „бомбите“ во иднина да не бидат основа за подигање обвиненија, не беа прифатени.
Околу пладне спикерот Талат Џафери имаше координација со собраниското раководство, по чие завршување имаше оптимистички најави дека седницата ќе почне по 15 часот и дека целта е во текот на денешниот ден да биде барем затворена расправата за двете законски решенија, за утре да може да бидат ставени на гласање. Но, со оглед на тоа што се уште траат обидите за обезбедување 80 гласа, и натаму е неизвесно дали седницата ќе почне до крајот на денот.
Не се знае ниту дали законот за ЈО ќе биде ставен на гласање и во случај да нема двотретинско мнозинство. Сепак, соговорниците од СДСМ не исклучуваат и таква можност, со верување дека до чинот на гласање може уште некој од пратениците да се охрабри да го стисне „зеленото копче“. Овој закон, како што велат од раководството на СДСМ, „е за правна држава и за ЕУ, така што секој пратеник треба да живее со својата одлука, каква и да биде“.