Во предлог-буџетот се вградени и 23 амандмани во вкупна вредност од 382 милиони денари, од кои најголем дел се од опозицијата. Дел од нив се и амандманот за создавање на интервентен фонд во земјоделството и амандманите за енергетска ефикасност
Расправата за предлог-буџетот треба да заврши за пет дена
Предлог-буџетот за 2022 година е одговор на предизвиците што претстојат, но е и во насока на реализација на приоритетите за следната година, истакна министерот за финансии Фатмир Бесими на денешната пленарна седница на која започна расправата за предлог-буџетот за 2022 година.
Предвидувањата за економијата на глобално ниво за 2022 година, како што посочи Бесими, се оптимистички, а во македонската економија се очекува годината да заврши согласно проектираниот раст на БДП од 4,1 отсто, но со реална можност и да се надмине и да изнесува 4,6 проценти во услови на зголемување на инвестициите, раст на потрошувачката на солидно ниво и стабилизирање на надворешната побарувачка.
Дополнетиот предлог-буџет, според него, ги отсликува економските и социјалните политики што ќе ги спроведува Владата, а во делот на капиталните инвестиции ги спомена изградбата на патната инфраструктура од Коридор 8 и Коридор 10, подобрувањето на условите во образованието, зелената транзиција и модернизацијата на земјоделското стопанство.
„Поедноставно кажано во 2022 година ќе имаме развоен буџет, а развојната компонента се гледа преку зголемените средства за капитални расходи за околу 28,3 проценти во однос на 2021 година или во 2022 година се предвидени 8,4 милијарди денари повеќе за капитални проекти“,
рече Бесими и додаде дека е запазено т.н. златно правило во јавните финансии, односно првпат капиталните инвестиции се повисоки од буџетскиот дефицит.
Вкупните расходи во предлог-буџетот се планирани на 272,4 милијарди денари или 35,2 проценти од БДП, а вкупните приходи се планираат на ниво од 238,9 милијарди денари или 30,9 проценти од БДП. Дефицитот е проектиран на ниво од 33,5 милијарди денари или 4,3 проценти од БДП, а капиталните инвестиции ќе изнесуваат 38,2 милијарди денари.
Во предлог-буџетот се вградени и 23 амандмани во вкупна вредност од 382 милиони денари, од кои, како што посочи Бесими, најголем дел се од опозицијата. Дел од нив се и амандманот за создавање интервентен фонд во земјоделството и амандманите за енергетска ефикасност.
За опозицијата предлог-буџетот во висина од 4,4 милијарди евра е најобемниот буџет досега, нереален и неразвоен. Според опозицијата, не се предвидени пари за енергетската криза, а висок е и проектираниот буџетски дефицит. Проекциите за капиталните инвестиции сметаат дека се лага имајќи предвид дека нивната реализација во изминатите години е мала.
„Во овој буџет Владата не предвидела средства за справување со енергетската криза која долго време ја игнорираше пред да стане работата сериозна. Граѓаните се оставени сами на себе“,
рече Бојан Стојанвски од ВМРО-ДПМНЕ, забележувајќи дека предлог-буџетот е подготвен во период кога Владата не знаела каков ќе биде исходот од локалните избори.
Пратеникот критикуваше дека Владата одобрила за себе расходи од 4,43 милијарди евра, што е за 59 милиони евра повеќе од ребалансираниот буџет за оваа година, и го прави Буџетот за 2022 година убедливо најгломазен во историјата на земјава. За тековни расходи ќе отидат дури 3,8 милијарди евра. Во нив значаен дел земаат трошоците за платите 1 284 000 000 денари повеќе од 2021 година;
„За договорни услуги ќе се потрошат 1 304 000 000 денари повеќе, за трансфер до НВО 31 000 000 милиони денари повеќе, ќе се набави мебел за 24 000 000 денари повеќе споредено со Буџетот 2021 година или 28,4% повеќе, а ќе се набават нови возила за 212 000 000 денари повеќе или фантастични 174,6%, во услови кога имаме зголемена инфлација, сиромаштија, здравствена, економска и енергетска криза. Огромна сума или близу половина од целиот Буџет оди за социјалните трансфери. Оваа расходна ставка со буџетот за 2022 година ја надминува психолошката граница од 2 милијарди евра и ќе тежи 2,024 милијарди евра, што е зголемување за 30 милиони евра во однос на ребалансираниот буџет, факт што ги руши розовите лаги на власта и што директно укажува на тоа дека сиромаштијата непрекинато расте“,
посочи пратеникот Стојаноски.
Расправата за предлог-буџетот, кој е во второ читање, треба да заврши за пет дена. Претходно, предлог-буџетот беше разгледан на собраниската Комисија за финансирање и буџет од каде што повторно беше вратен во Владата и дополнет со усвоените амандмани.