Рашковски во судницата се појави со планина документи, кои предизвикаа љубопитство меѓу новинарите и јавноста присутни во судницата 1 во Основниот кривичен суд Скопје. Пред почетокот на завршните зборови, тој им даде по еден примерок од документите на судечкиот совет и на обвинителот. На паузата, по речиси двочасовниот збор на Рашковски, се одгатна прашањето за материјалите откако по еден примерок со копмакт-диск добија и новинарите и претставниците на невладините организации што го следат судскиот процес. Станува збор за укоричени копии од завршните зборови на првообвинетиот во случајот „Софтвери“, во кои на повеќе од 300 страници ги анализира доказите на Основното јавно обвинителство за гонење на организираниот криминал и корупцијата (ОЈО ГОКК)
Обемниот материјал, според кажаното од Рашковски во судницата и напишаното во писмениот материјал, покажува дека Обвинителството не успеало да докаже ниту една од своите „седум теории“ што ѝ ги сервирало на јавноста
Се надевам на правична одлука на судот која ќе биде ослободителна – порача на крајот од своите завршни зборови поранешниот генерален секретар на Владата, Драги Рашковски, кој е првообвинет во случајот „Софтвери“.
Завршните зборови на Рашковски и на неговата одбрана траеја повеќе од четири часа, од кои две третини му припаднаа на обвинетиот генерален секретар на Владата кој, како што истакна, колку што во целата судска постапка мотив било докажувањето на невиноста, исто толку било и докажувањето на еден нов начин на водење на предметите во судската пракса.
Рашковски во судницата се појави со планина документи, кои предизвикаа љубопитство меѓу новинарите и јавноста присутни во судницата 1 во Основниот кривичен суд Скопје. Пред почетокот на завршните зборови, тој им даде по еден примерок на судечкиот совет и на обвинителот. На паузата, по речиси двочасовниот збор на Рашковски, се одгатна прашањето за документите, откако по еден примерок со компакт-диск добија и новинарите и претставниците на невладините организации што го следат судскиот процес.
„Случај ‘Софтвери’ – писмени завршни зборови“ – е наведено на корицата од „книгата“ која, како што кажува и самиот наслов, беа завршните зборови на обвинетиот, отпечатени на 328 страници и укоричени, во најмал случај, како студентска скрипта.
На првата страница, пак, авторот напишал дополнителен наслов: „Анатомија на обвинителен акт“.
На триста страници, обвинетиот Рашковски ги анализира доказите на Основното јавно обвинителство за гонење на организираниот криминал и корупцијата (ОЈО ГОКК) кое го поднесе обвинението. Заклучокот од обемниот материјал од завршните зборови на Рашковски е дека ОЈО ГОКК не успеало да докаже ниту една од своите „седум теории“ што ѝ ги сервирало на јавноста.
„Во целиот овој процес одбраната беше таа што напаѓаше, а Обвинителството на таквите напади немаше никаков одговор: Девизата на одбраната е – нападот е најдобра одбрана. Незнаењето плус моќ е еднакво на тиранија“,
пишува Рашковски на крајот од своите завршни зборови во писмена форма, на страницата нумерирана со бројот 328.
Во усното излагање на завршните зборови обвинетиот цитираше повеќе значајни личности од областа на правото, природните науки, филмот и музиката – меѓу кои и Никола Тесла, Чак Норис (досетки поврзани со актерот), Би Би Кинг…, обидувајќи се преку параболи да ги докаже „апсурдите во обвинителниот акт“.
Говорејќи за доказите на Обвинителството, Рашковски пред судот рече:
„Римјаните велеле: Празните садови најмногу тропаат“.
Продолжувајќи во овој контекст, тој рече дека во недостиг на соодветни докази целата постапка почнала медиумски.
„Сметам дека Обвинителството не постапи по допрен глас, туку гласот допре од Обвинителството. Како започна сè? Сè започна со една изјава во медиуми дека Рашковски ги нарекол обвинителите глупави. Никаде, во ниту еден записник не може да се најде основа за ваква моја порака“,
рече Рашковски.
Во судницата, како и во своите писмени завршни зборови, Рашковски наведе дека Обвинителството не успеало да докаже дека тој ја злоупотребил службената положба и овластување, едно од кривичните дела што му се ставаат на товар и дека ја фаворизирал фирмата „Инвока“ во дел од јавните набавки бидејќи, како што наведува, постапката за набавка била компетитивна и на неа имало тројца понудувачи.
Софтверот е целосно функционален
Тој ја негира и тезата на Обвинителството дека системот што бил набавен не бил имплементиран и дека не бил функционален.
„Софтверот за контрола на брзината во сообраќајот е целосно имплементиран пред да биде наплатена фактурата од ‘Инвока’, за што постојат и повеќе докази… Софтверот за контрола на брзината во сообраќајот е технички имплементиран многу порано пред потпишувањето на записникот за технички прием и е имплементиран на серверите на Владата кои се наоѓаат во ‘Македонски телеком’. Имено, на тие сервери се наоѓа комплетно инсталиран систем, преку кој, не само што е вршено тестирање на неговата функционалност туку е вршено и негово ползување со цел прибирање информации за потребите за кои е набавен, како пред потпишување на записникот за примопредавање, така и после тоа“,
наведува Рашковски во своите завршни зборови.
Тој негираше дека во случајот го откупил својот патент и посочи дека софтверот за сообраќајни прекршоци имал повеќе карактеристики од неговиот патент.
„Она што се патентира се само патентните барања, кои во случајот се три, а тие воопшто не се софтвер, туку начин на реализација на процес“,
наведува Рашковски во своите писмени завршни зборови.
Во врска со кривичното дело перење пари, првообвинетиот наведува дека се точни наводите оти средствата кои лицето Мухамед Халими ги уплаќал на сметка на семејството Рашковски биле пари кои тој му ги давал во готово за да уплати тековни трошоци. Но, вели Рашковски, неточни се наводите дека средствата потекнуваат од кривично дело.
„Јавниот обвинител воопшто не го зема предвид фактот дека луѓето имаат живот и надвор од вршењето на своите функции, односно имаат приватен живот… Јавниот обвинител, намерно или ненамерно, не ги зел предвид анкетните листови што лицето Драги Рашковски ги доставувало до Државната комисија за спречување на корупцијата (ДКСК). Да ги зел предвид, ќе видел дека сите средства за кои ЈО спори дека се стекнати со незаконска основа, всушност, се уредно пријавени во поднесоците до ДКСК“,
наведува Рашковски во завршните зборови.
Поранешниот генсек на Владата рече дека Обвинителството не понудило доказ дека лицата кои биле ангажирани хонорарно ваделе пари и му ги давале нему.
„Нема ниту еден доказ за трансфер на пари, туку една фикција на наводни пораки“,
кажа Рашковски.
Тој во завршите зборови во судницата го доведе во прашање и начинот на генерирање и форензичкото екстрахирање на пораките од телефоните на обвинетите како, на пример, дека лицето што ја вршело постапката немало лиценца за вештак.
„Екстрахирањето не го прават од уредите, туку од форензичката копија која ја имаат направено“,
рече Рашковски.
Во заклучните согледувања, како што е именувана последната глава од неговите завршни зборови, Рашковски пишува:
„Единственото точно од сето ова (на Обвинителството) е дека лицето Драги Рашковски е службено лице“.
Неговиот адвокат Владимир Доневски во завршните зборови претходно посочи дека ОЈО ГОКК со ниту еден доказ не докажало дека Драги Рашковски не ги извршил своите обврски во извршувањето на четирите јавни набавки.
Нема свест и намера за кривичните дела
Тој истакна дека од обвинението изостануваат сите законски обележја за свест и намера за кривичното дело злоупотреба на службена положба и овластување, кое му се става на товар на обвинетиот Рашковски.
„Судот оваа постапка може да ја заврши само на еден начин, а тоа е донесување пресуда со која обвинетиот ќе се ослободи од обвинението бидејќи Јавното обвинителство не покажа дека обвинетиот ги сторил кривичните дела надвор од разумното сомнение“,
рече адвокатот.
По завршувањето на денешното рочиште од адвокатското друштво „Доневски“ преку писмено соопштение до медиумите се огласи адвокатот на Рашковски, Владимир Доневски, во кое реферира на, како што се наведува, јавната кампања со која започнал овој процес, која била со цел да се создаде негативна слика во јавноста за првообвинетиот во случајот „Софтвери“.
„Денес со давање на завршните зборови на одбраната заврши процесот познат на јавноста како случај ‘Софтвери’. Овој процес започна со јавна кампања која за своја цел имаше создавање негативна слика во јавноста за Драги Рашковски. Понатаму, надлежното јавно обвинителство продолжи преку информирање на јавноста да ја зацврстува таа негативна слика за Драги Рашковски. Така започна и судскиот процес во кој се боревме против ‘пресумпцијата на вина’ создадена како резултат на таквата јавна кампања. Ние како одбрана која не располага со таква моќ за создавање на јавна слика, ниту спрема јавноста ниту спрема судот, го браневме Драги Рашковски со законски средства и на законит начин, во правна борба која се одвива во судница. До денес не излеговме во јавност бидејќи одбраната, а исто така и гонењето на осомничените се води во судската ‘арена’, а не преку медиуми. Додека, пак, соопштенијата испраќани до вас медиумите од страна на Драги Рашковски ги цениме како природна реакција на лице кое е неосновано обвинето. Имено, таквата кампања на обвинителството која како што кажавме резултираше со ‘пресумција на вина’ на почетокот на постапката, успеавме во судница со изведување на докази да ја срушиме во целост. Па така, сега Судот ќе мора да ги види цени доказите на одбраната кои ја докажува невиноста на обвинетиот. Поради тоа, како одбрана бараме судот да пресуди само врз основа на доказите, со што би ја докажал независноста, објективноста и непристраноста во оваа кривична постапка“,
се наведува во дописот од адвокатот Доневски.
На денешното рочиште завршни зборови даде и одбраната на обвинетиот Даниел Станчев, која исто така побара ослободителна пресуда, со што судскиот процес се доведе до самиот крај, чиј конечен епилог се очекува да биде изрекувањето на пресудите од страна на Судот.
Обвинителството своите заврши зборови ги даде на 13 мај и во нив му предложи на судот да ги осуди на казни соодветни на сторените кривични дела, со што ќе влијае како на специјалниот, така и на генералниот план на превенција.
Случајот за Рашковски го отвори „360 степени“ во март 2021 година. Тогаш објавивме дека Генералниот секретаријат на Владата купил софтвер за сообраќајни прекршоци вреден 81 000 евра, иако ниедна институција ниту го барала, ниту го користи, како и дека пред да го купи, како генерален секретар на Владата, тој лично регистрирал таков патент.
Институцијата надлежна да казнува за сообраќајни прекршоци – МВР, а не Владата, тогаш одговори дека ниту барало ниту планира да го користат софтверот за кој никој не ги прашал.
Предметот што го отвори Основното јавно обвинителство за гонење организиран криминал и корупција потоа се прошири и по завршување на истрагата беше поднесено обвинение кое опфаќа четири набавки, и тоа на: систем за биометриска идентификација; софтвер за определување на просечна брзина на возила во сообраќајот и изрекување на казни; ANPR-камери за препознавање регистарски таблички за возила; и на метални кабини за потребите на системот на биометриска идентификација и систем за автоматско препознавање на регистарски таблички.
Покрај тендерите, дел од обвинението за предметот е и исплата на хонорари.
Рашковски како првообвинет се гони за делата злоупотреба на службената положба и овластувања и перење пари. Со него се обвинети уште шест лица поврзани со фирмата „Инвока“, од која бил купен софтверот за сообраќајни прекршоци, но и лица кои биле соработници, а некои од нив и хонорарци во Владата: Ивица Димитровски, Игор Христов, Даниел Станчев, Ирена Ивановска, Игор Ивановски и Маја Силјановска.