Тој посочи дека уплатите ги вршел во готово, најчесто во, како што рече, Тутунска банка (НЛБ Банка н.з.), но посочи на случај кога поради големата сума морал да изврши уплата преку трансакциска сметка – неговата. Како што рече, станувало збор за сума од 300 000 денари, пари што Рашковски му ги дал во готово и, според сведокот, биле за осигурување
Меѓу другите дневни обврски и задолженија што ги имав како обезбедување на Драги Рашковски (како тогашен генерален секретар на Владата), вршев и уплати на пари во банка што г. Рашковски ми ги даваше во готово, сведочеше на денешното судско рочиште за случајот „Софтвери“, Мухамед Халин, полициски инспектор вработен во Министер за внатрешни работи, кој од јуни 2017 до мај 2021 година работел во Шестата управа за обезбедување лица и објекти и му бил телохранител на поранешниот генсек на Владата, сега првообвинет во случајот.
Одговарајќи на прашања на јавната обвинителка од Основното јавно обвинителство за гонење организиран криминал и корупција (ОЈО ГОКК), Ивана Трајчева, сведокот пред судот рече дека уплатите што ги вршел за Рашковски биле за школарина на поранешниот генерален секретар на Владата сега обвинет во случајот „Софтвери“, за школарината на детето на Рашковски и за осигурување на неговото потесно семејство.
Тој посочи дека уплатите ги вршел во готово, најчесто во, како што рече, Тутунска банка (НЛБ банка н.з.), но посочи на случај кога поради големата сума морал да изврши уплата преку трансакциска сметка – неговата. Како што рече, станувало збор за сума од 300 000 денари, пари што Рашковски му ги дал во готово и, според сведокот, биле за осигурување.
„Обично ќе ми беше пишано на ливче и ќе појдев во банка да ги уплатам средствата. Уплатите ги вршев во готово. Г. Рашковски ќе ми ги дадеше средствата и откако ќе ја завршев работата го известував. Еден поголем износ го имам уплатено преку мојата трансакциска сметка бидејќи шалтерскиот работник ми кажа дека 300 000 денари мора да се уплатат преку трансакциска. Го известив Рашковски дека на дел од уплатите стои и моето име, без да знам од каде се и што се. Парите ми ги даваше г. Рашковски во неговиот кабинет каде што сите работи и задолженија беа кажувани набрзина“,
рече полицаецот пред судот.
На прашање на обвинителката, тој посочи дека Рашковски никогаш не броел пари пред него. За конкретниот случај додаде дека кога ги уплаќал тие 300 000 денари му недостасувале уште 3 000, кои ги уплатиле следниот ден откако го известил поранешниот генерален секретар на Владата и тој му ја дал сумата што недостасувала.
Сведокот пред судот сведочеше дека кога го известил Рашковски дека сумата ја уплатил од својата трансакциска сметка и прашал дали претставува проблем што стои неговото име, добил одговор дека сè е во ред.
„Народски кажано, ми рече: ‘Уживај, сè е средено’“,
рече Халин.
Полицискиот инспектор и поранешен телохранител на Рашковски наведе уште еден случај поврзан со уплата на пари, кога добил задолжение да изврши уплата за кредитна картичка. Уплатата ја извршил во Стопанска банка, кај Зелен пазар, бидејќи такви насоки добил од Рашковски.
„Таму ме испрати г. Рашковски и рече ако има некакво проблем да се јавам кај некоја личност, која јас не ја познавам, затоа што се уплаќа на кредитна картичка и било проблематично бидејќи, претпоставувам, секој не може да го направи тоа“,
рече сведокот.
Обвинетиот Рашковски при вкрстеното испрашување потврди дека на сведокот, како тогашно негово обезбедување, му дал 600 000 денари да ги уплати во банка, но додаде дека Халин во еден момент од постапката во случајот бил еден осомничен, но подоцна му била отстранета оваа квалификација, констатација на која обвинителката Трајчева веднаш даде приговор.
Рашковски потоа извади фотографија и го праша полицискиот инспектор: „Дали сте ова вие на мојата свадба“?
Обвинителката Трајчева приговори бидејќи, како што рече, за постапката е ирелевантно дали сведокот бил на свадбата на Рашковски.
„Со ова сакам да докажам дека не станува станува збор за некој кому така „рандом“ (произволно) му биле давани пари туку дека станува збор за лице со кое сме биле во блиски односи. Ми беше возач на свадбата во 2016 година“,
рече првообвинетиот во случајот „Софтвери“.
Инаку, со денешното рочиште и сведочењето на полицискиот инспектор заврши доказната постапка на Обвинителството. Судскиот процес продолжува со изведување докази на предлог на одбраната. Судењето продолжува на 14 декември.
На денешното рочиште изјава пред судот даде претставник на правобранителството, околу висината на средствата што државата бара да бидат наплатени од обвинетите како отштета.
Случајот за Рашковски го отвори „360 степени“ откако во март лани објавивме дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи, како генерален секретар на Владата, тој лично развил таков софтвер за сообраќајни казни и го патентирал.
Рашковски тврдеше дека софтверот треба да биде дел од т.н. „Сејф сити“, но единствената институција со право да казнува, Министерството за внатрешни работи, брзо ја урна тезата на Рашковски со ставот дека ниту барало ниту планира да го користат софтверот за кој никој не го прашал.
Набргу потоа Обвинителството за гонење организиран криминал и корупција отвори предистрага, а потоа и истрага. Во истрагата беа споени и други предмети, а на 8 октомври лани беше поднесено обвинение. Кривичен го прифати во целост обвинението на 29 декември 2021.