За реакцијата од градоначалникот на Пустец, Пали Колефски, премиерот на Албанија вели дека се извинил за грешка што не е негова, но се покажал како достоен државник и граѓанин на европска Албанија
По реакцијата на Министерството за Европа и надворешни работи на Албанија за неинтонирањето на албанската химна вчера на фолклорниот фестивал во Пустец, со објава преку социјалната мрежа Икс се огласи и премиерот на Република Албанија, Еди Рама. Според Рама, градоначалникот на Пустец, Пали Колефски, иако реагирал и побарал да се изведе и албанската химна, бил игнориран, а се извинил за грешка што не е негова. Рама вели дека Колефски се покажал како достоен државник и граѓанин на европска Албанија.
„Ние ја почестивме таа мала заедница со посебен статус како посебна општина, токму затоа што за Албанија малцинствата не се статистика, туку национално богатство, а малцинските граѓани не се бројки, туку браќа и сестри со исти слободи и права како и сите нас. Сега, ова повремено пристигнување на нашата територија на циркуски трупи на балканскиот национал-фолклоризам, понекогаш од една земја, а понекогаш и од друга, не само што не нè загрижува за себе, за суверенитетот на Албанија, не, не, туку и за рамнотежата на политичкиот живот овде внатре, каде што нема тројански мазги одгледувани во нашите ридови или ’дијаспора’ извезена од нашето соседство што нè потресува, бидејќи европска Албанија веќе ја помина својата адолесценција како демократска држава“,
напиша Рама.
Ajo që ndodhi në Pustec është një parodi domethënëse për botëkuptimet tona të ndryshme në këtë lagje të Europës.
— Edi Rama (@ediramaal) August 21, 2026
Kryetari i Bashkisë së Pustecit, Pali Kolefski, kërkoi paraprakisht që të luhej edhe himni shqiptar. U injorua dhe më pas kërkoi ndjesë për një faj që nuk ishte i…
Рама додаде дека Албанија, балканската Европа никогаш не може и нема да си дозволи да ги спушти своите вредности на нивото на пародијата во Пустец.
И Министерството за Европа и надворешни работи на Албанија реагираше, опишувајќи го отсуството на албанската химна како сериозен недостаток на почитување на националните симболи и правилата на институционалниот протокол. Реакција стигна и од градоначалникот на Пустец, Пали Колефски, кој соопшти дека настанот го организирало здружението „ВМРО-ДПМНЕ Албанија“. Тој се извини во име на организаторите и додаде дека Општина Пустец била само поканета во овој настан, а не учествувала во организирањето.
Вчера во Мала Преспа беше организиран фолклорниот фестивал „Преспа 2026“ посветена на македонската традиција, култура и фолклор, каде што присуствуваше и премиерот Христијан Мицкоски.