Ниту на гробишта ниту во болници ќе има место ако не се однесуваме правилно, им порача на албанските државјани премиерот Еди Рама преку социјалните мрежи.
Тој објави и видео со медицинскиот персонал од Инфективната клиника, кој се грижи за пациентите заразени од Ковид-19 и вели дека се вознемирени од неодговорното однесување на оние кои „ја саботираат оваа војна“.
Според Рама, лекарите покажуваат херојство, додека саботерите прават невидено предавство.
„Овие лекари прават херојство, додека саботерите прават невидено предавство кое ќе го отвори гробот за нас, освен ако не биде итно запрено! Доколку сите правилно не се однесуваме во оваа борба, нема каде да ги легнеме болните и нема да има место ниту во гробиштата, а не во болниците“,
пишува Рама на Фејсбук.
Тој излезе и со посебна порака до младите: „Останете дома. Не земајте ја ‘бомбата’ од надвор за да ги убиете родителите, дедовците и бабите“.
Како што вчера најави Рама, денеска и утре на целата територија на земјата дозволено е движење само од 5 до 13 часот. Ова важи и за трговските објекти за продажба на храна, за аптеките и банките.
Од 13 до пет часот наутро движење е дозволено единствено на припадниците на армијата, на полицијата, специјалните државни служби и медиумските компании.