Денешната изјава на Радев во врска со посетата на Петков е спротивна на она што тој го кажа и во говорот во Собранието на 19 јануаари и во изјавата ден потоа
За средбата на претседателот Стево Пендаровски со ОМО Илинден, бугарскиот претседател рече дека за жал постапките и однесувањето на претседателот на Република Северна Македонија не придонесуваат за толку посакуваниот напредок на РСМ кон ЕУ
Претседателот на Бугарија, Румен Радев, посетата на премиерот Кирил Петков на Северна Македонија била избрзана.
„Посетата на премиерот беше избрзана, имав искрени разговори со него. За бугарската дипломатија е важно целосно да го реализира својот професионален капацитет, да не верува на надворешната експертиза, невладините организации и да не подлегнува на надворешниот притисок. Секоја избрзана акција на бугарската влада, секој позитивен прелиминарен сигнал може погрешно да се протолкува како некакви отстапки од бугарска страна“,
изјави Радев, одговарајќи на новинарски прашања пред неговото учество на настанот „Светот напред 2022“ во организација на „Економист“ во Софија, ја пренесе МИА веста на бугарската агенција БТА.
Запрашан за средбата на претседателот Стево Пендаровски со ОМО Илинден, Румен Радев рече дека за жал постапките и однесувањето на претседателот на Република Северна Македонија не придонесуваат за толку посакуваниот напредок на РСМ кон ЕУ.
„Секое барање за реципроцитет во граѓанските права е контрапродуктивно. Македонските Бугари се борат за еднаквост, која ќе биде загарантирана во нивниот устав со регистрирање. Тие се борат за нивна целосна интеграција во јавниот живот на државата. Тоа е радикално различно од сепаратистичките ставови и малцинските тврдења што ги исповедува народот со кој се среќава претседателот Пендаровски“,
изјави Радев.
Радев потенцирал дека Бугарија е секогаш отворена за дијалог.
„Бугарија цело време иницираше дијалог, кога политичарите на РСМ беа на турнеја низ европските метрополи и ја избегнуваа Софија, но мило ми е што тој дијалог почнува да се случува, рече претседателот. Во контакт сме со претседателот Стево Пендаровски, но ќе бараме погоден момент за средба на високо ниво, секако зависи и од неговите постапки“,
изјави Румен Радев.
Денешната изјава на Радев во врска со посетата на Петков е спротивна на она што тој го кажа и во говорот во Собранието на 19 јануаари и во изјавата ден потоа.
Во Собранието Радев оцени дека предложениот пристап од Владата кон нашите соседи има потенцијал да го динамизира дијалогот и треба да биде поддржан но, порача дека ваквиот пристап, како што рече, не треба да ги стави во втор план проблемите за правата на „нашите сонародници и заедничкото историско-културно минато“.
„Сакам да бидам правилно разбран: Јас сум меѓу политичарите кои посакуваат РСМ да стане членка на ЕУ. Токму затоа треба да им помогнеме на нашите соседи да ги надминат идеологизмите од тоталитарното минато и да ги исполнат критериумите за членство. Како одговорна членка на ЕУ, Бугарија треба да интегрира во него партнери, а не проблеми“,
рече Радев во говорот.
Ден потоа, во изјава за новинарите Радев рече дека по посетата на премиерот Кирил Петков на Скопје, има многу позитивни сигнали и според него, треба да се поддржи секој чекор што води кон продлабочување на односите.
„Има многу позитивни сигнали од оваа посета. Сепак, се надевам, како што кажав во средата од собраниската говорница, заедно со сите напори за подобрување на поврзаноста, инвестициите, економијата, соработката – да не заборавиме на главните прашања што треба бидат решени и кои, всушност, ќе ја отклучат вратата за почеток на преговорите“,
истакна бугарскиот претседател.