Фирмите кои работат само прва смена треба да го прилагодат своето работење на ограничувањата за движење за заштита од коронавирусот. Оние кои работат во две, три и четири смени ќе имаат можност да издаваат дозволи за своите вработени кои ќе важат само за одење и враќање од работа, објасни министерот за економија Крешник Бектеши на онлајн информативна видеосесија за новите мерки на владата што стапија на сила денеска.
„Сопствениците и управителите на компаниите кои работат, втора, трета и четврта смена можат да им издаваат дозволи на совите вработени за доаѓање до работа и одење од работа до дома кои не треба да бидат заверени од Министерството за внатрешни работи. МВР ќе има право да ги контролира вработените и ќе може да ги санкционира доколку ги злоупотребуваат. Им препорачувам на фирите да ги почитуваат и сите препораки од Владата за заштита на здравјето на работниците“,
рече Бектеши.
Тој изрази надеж дека тоа ќе им помогне на економските оператори да ги завршат своите обврски, а државата да им овозможи континуитет во создавањето продукти кои се повеќе од потребни во вакво време.
„Снабдувањето со основните производи во земјава моментално е одлично и нема основ за никаква паника, бидејќи се е под контрола“,
потенцира Бектеши.
Појасни дека во време на полицискиот час ќе можат да работат и сите ресторани и маркети што вршат он-лај продажба и испорачуваат храна.Тие ќе ги користат истите дозволи.
Бектеши нагласи дека Државниот пазарен испекторат ќе контролира дали некој ја злоупотребува ситуацијата и ги зголемува цените на призводите што се испорачуваат и ги повика граѓаните да пријавуваат на телефонот 191 доколку забележат такво нешто во продавниците или, пак, кај оние што доставуваат храна.
„Сега не е време за профит. Сега е време за солидарност и сите заедно да се бориме против коронавирусот. Нема да има никакви компромиси како што не сме направиле ни досега. Веднаш по објавувањето на вонредната состојба ние ги замрзнавме цените и ги вративме назад на нивото од 11 март. На дневна база следиме што се случува, а испекторите на ДПИ се 24 часа на терен“,
рече Бектеши.
Тој посочи дека во моментов немаат забележано зголемување на цените на фактурите за увозни стоки и додаде дека Министерството за економија, заедно со Царинската управа, секојдневно ја следи состојбата и доколку забележи зголемување на цените ќе ги замрзнат како што веќе направија со јужното овошје.
За големите градежни компании посочи дека сами ќе треба да го организираат нивниот работен процес, со почитување на сите препораки дадени од Владата и Министерството за здравство, односно да има растојание од 1,5 до два метра помеѓу секој работник и да користат средства за дезинфекција, заштитни маски и ракавици.