Кремљ соопшти дека Путин ги посетил регионите Херсон и Луганск, при што присуствувал на состанокот на воената команда во Херсон и го посетил штабот на националната гарда во Луганск. Сепак, оттаму не соопштуваат кога точно рускиот претседател ги посетил регионите
Рускиот претседател Владимир Путин бил во посета на безбедносните сили во делови на Украина што Москва ги смета за своја територија откако минатата година ги анектира, објави денеска Кремљ, пренесува Ројтерс.
Кремљ соопшти дека Путин ги посетил регионите Херсон и Луганск, при што присуствувал на состанокот на воената команда во Херсон и го посетил штабот на националната гарда во Луганск.
Сепак, оттаму не соопштуваат кога точно рускиот претседател ги посетил регионите.
Како што пренесува новинската агенција, Путин ги слушал извештаите на командантите на воздухопловните сили и армиската група „Днепар“, како и други високи офицери кои го информирала за ситуацијата во регионите, кои Москва ги смета за дел од Русија.
Инаку, руските трупи се повлекоа од градот Херсон во ноември минатата година и ги зајакнаа своите своите позиции на спротивниот брег на реката Днепар во очекување на украинската контраофанзива, потсетува Ројтерс.
Посетата на Путин се оценува како ненадејна бидејќи за разлика од западните лидери кои досега во голем број го посетија Киев по инвазијата на земјата пред 14 месеци, рускиот претседател ретко посетува делови од Украина кои се под контрола на Москва.
Минатиот месец тој ги посети регионот на полуостровот Крим, кој Русија го анектира во 2014 година и градот Мариупол.
Соопштението на Кремљ за посетата на Путин на регионите на Херсон и Луганск доаѓа откако министрите за надворешни работи на седумте најразвиени земји во светот Г-7 на состанок во Јапонија го осудија планот на Русија за распоредување на тактичко нуклеарно оружје во Белорусија, оценувајќи го како „неприфатлив“.
„Неодговорната руска нуклеарна реторика и нејзината закана за распоредување нуклеарно оружје во Белорусија се неприфатливи. Секоја употреба на хемиско, биолошко и нуклеарно оружје од страна на Русија би била пресретната со тешки последици“,
рекоа министрите во коминикето на крајот од тридневниот состанок во Јапонија, пренесува Ројтерс.
Во меѓувреме Киев соопшти за нови напади на руската авијација врз украинските позиции во источниот регион Донецк. Според официјални претставници од овој регион во неселективно гранатирање на регион Луганск загинале неколку цивили и причинета е голема штета на инфраструктурата.
Генералштабот на вооружените сили на Украина во својот дневен извештај наведува дека руските сили користеле оперативно-тактичка и офанзивна авијација во обидите да напредуваат кон градовите Лиман, Бахмут, Авдиевка и Маринка во Донецк.
Украинската армија во изминатите 24 часа одбила повеќе од 70 непријателски напади врз Бахмут и Маринка, кои се уште се епицентар на борбите.