Рускиот претседател во говорот уверуваше дека е невозможно да се изолира Москва и упати обвинувања кон Западот за прашањето со извозот на украинско жито, за што рече дека речиси целиот извоз завршува во земјите од ЕУ, а не во сиромашните и земјите во развој
Русија не изгуби ништо во својата „специјална воена операција“ во Украина, рече рускиот претседател Владимир Путин во говорот што го одржа на отворање на пленарната сесија на Источниот економски форум во Владивосток денеска.
„Ништо не изгубивме и нема да изгубиме. Нашата главна придобивка е зајакнување на нашиот суверенитет. Ние ништо не почнавме во однос на воена акција, туку само се обидуваме да ја завршиме“,
рече Путин во говорот тврдејќи дека Русија не го почнала конфликтот во Украина.
За санкциите што ги наметна Западот поради војната што ја почна Русија, тој во говорот тврдеше дека е невозможно да се изолира Москва.
„Без разлика колку некои би сакале да ја изолираат Русија, тоа е невозможно“,
вели тој.
Според него, пандемијата на коронавирусот е заменета со нови глобални предизвици кои му се закануваат на целиот свет наведувајќи дека тука мисли на западните санкции кон неговата земја.
Тој упати обвинувања кон Западот и околу прашањето за извозот на украинско жито, за што на 22 јули во Истанбул беше потпишан договор од претставници на завојуваните земји Украина и Русија и посредниците за постигнување на договорот – ОН и Турција. Според него, извезеното жито завршува пред сè во европските, а не во сиромашните земји, што рускиот претседател смета дека е ризик за хуманитарна катастрофа.
„Речиси целото жито што се извезува од Украина не се испраќа во земјите во развој и сиромашните, туку во земјите од ЕУ“,
рече Путин.
Тој предложи и да се разгледа можноста за ограничување на извозот на жито во Европа и за ова прашање најави дека ќе разговара со турскиот претседател Реџеп Таип Ердоган.
„Можеби треба да размислиме за ограничување на извозот на жито и друга храна по оваа рута (од Украина до Европа). На оваа тема дефинитивно ќе се консултирам со турскиот претседател Ердоган. На крајот на краиштата, јас и тој го разработивме механизмот за извоз на украинско жито“,
рече Путин.
Во говорот на Источниот економски форум тој ја поздрави и „сè поголемата улога“ што ја има азиско-пацифичкиот регион во светот за разлика од улогата на Западот која, оцени, дека е во опаѓање.