Според соопштението на руското Министерство за одбрана, на негово место е поставен Алексеј Кузменков, поранешен функционер на Националната гарда
Руската армија го смени Михаил Мизинцев, генералот задолжен за логистика на вооружените сили на земјата, соопшти руското Министерство за одбрана, пренесува АФП.
Смената на Мизинцев, како што наведува агенцијата, се случува пред најавената контраофанзива на украинските сили.
Според соопштението на руското Министерство за одбрана, на негово место е поставен Алексеј Кузменков, поранешен функционер на Националната гарда.
„Кузменков е именуван на местото заменик-министер за одбрана на Руската Федерација, задолжен за логистичка поддршка на вооружените сили“,
се наведува во соопштението на Министерството.
Сепак, во соопштението не се наведени причините за смената на генералот, кој на оваа функција беше само седум месеци.
Мизинцев е под британски санкции поради неговата улога во опсадата на украинскиот пристанишен град Мариупол, кој руските војници го зазедоа пред една година.
Познат во дел од западните медиуми како „касапот од Мариупол“, Мизинцев беше назначен за заменик-министер задолжен за логистика неколку дена откако претседателот на Русија ја најави кампањата за делумна мобилизација во септември, минатата година.
Мизинцев, кој е со чин генерал-полковник, претходно ја извршуваше функцијата началник на Центарот за контрола на националната одбрана на Русија.
Руската инвазија на Украина откри големи логистички проблеми во армијата на земјата кои станаа особено видливи за време на минатогодишната хаотична кампања за мобилизација.
Смените на генерали од раководни позици се честа околност во редовите на руската војска од почетокот на инвазијата на Украина на 24 февруари, минатата година.
Пред само неколку месеци, односно на почетокот на јануари, генералот Сергеј Суровкин беше сменет од позицијата командант на здружените сили во „специјалната воена операција во Украина“ – како што Москва ја нарекува инвазијата на оваа земја и на негово место беше поставен началникот на генералштабот на руските сили, генерал Валериј Герасимов.
Суровкин, кој руските медиуми го нарекоа „генерал Армагедон“ поради неговата наводна немилосрдност, беше командант на руските сили во Украина само три месеци.