Заболеното лице ќе остане во изолација, а луѓето со кои имал контакт се негативни на вирусот
Во Грција е потврден првиот случај на сојот омикрон, варијанта на вирусот ковид-19, информира тамошниот министер за здравство Танос Плеварис.
Инфекцијата е потврдена во Ханија, Крит, кај грчки државјанин кој се вратил од патување во Јужна Африка.
Теоклис Заутис, шефот на Националната организација за јавно здравје (ЕОДИ), соопшти дека мажот долетал на Крит на 26 ноември и направил брз антигенски тест на аеродромот, на кој излегол негативен.
На вториот тест, кој го направил веќе следниот ден, откако развил благи симптоми на ковид-19, повторно добил негативен резултат, додека третиот, на 29 ноември, ја потврдил инфекцијата. Здравствените власти утрово потврдиле дека станува збор за варијантата омикрон.
Заболеното лице ќе остане во изолација, а луѓето со кои имал контакт се негативни на вирусот.
Во меѓувреме, варијантата омикрон продолжува да се шири во повеќе европски земји. Денеска се потврдени два нови позитивни случаи во Белгија, а регистриран е и прв случај на заболен од овој вид на коронавирусот и во Франција.