Вработените побараа без одлагање да им се зголемат платите бидејќи, како што велат, нивните месечни примања во моментов заостануваат многу зад платите на другите независни регулаторни тела, како и на вработените во администрацијата воопшто
Вработените во Народниот правобранител денеска започнаа со мирен протест со кој го искажаа својот револт од статусот што го имаат како административни службеници. Сепак, вработените најавија дека граѓаните и во овој период, додека трае протестот, ќе можат да реагираат на неправилностите и повредата на правата, која секојдневно им се случува од страна на субјектите од јавниот сектор.
Вработените побараа без одлагање да им се зголемат платите бидејќи, како што велат, нивните месечни примања во моментов заостануваат многу зад платите на другите независни регулаторни тела, како и на вработените во администрацијата воопшто.
Државниот советник на Народниот правобранител и претседател на синдикалната организација при НП, Марјан Поњавиќ, на денешниот протест рече дека секоја институција омбудсман во светот, па и Народниот правобранител кај нас, треба да биде самостојна и независна, целосно одвоена од институциите спрема кои презема дејствија за заштита на правата на граѓаните, што кај нас не е случај.
Според него, потребно е ново законско решение со кое вработените во Народниот правобранител нема да бидат во кругот на вработени опфатени со Законот за административни службеници, туку ќе бидат самостојни и независни.
„За вработувањето во Народниот правобранител и за пополнување на упразнети работни места нема да се бара согласност од Министерството за финансии. Наведуваме дека е потребно, да се обезбедат посебни средства со буџетот со кои ќе се финансира работата на Народниот правобранител и на Одделот за внатрешна контрола, активности кои со години повремено се финансираат со проекти финансирани од странски партнери“,
додаде Поњевиќ.
Вработените во Народниот правобранител и како орган на Републиката формиран со Устав и закон, јавно го повикаа Собранието и пратениците веднаш да спроведат постапка за измена и дополнување на Законот за народен правобранител со вградување на горенаведените споменати прашања.
„Напоменуваме дека согласно нашите надлежности, вработените во Народниот правобранител, секојдневно работат со лични податоци на граѓаните, со класифицирани податоци, имаат директен контакт со сите категории на граѓани, особено со оние најранливи групи, вршат увид во институции и установи од секаков тип, што секако е причина тие да добијат одредено покачување на платите кое го имаат повеќе субјекти во државата кои немаат ни приближно вакви надлежности“,
додаде претседателот на синдикалната организација на Народниот правобранител.
Претседателот на Синдикатот на УПОЗ, Трпе Деаноски, на денешниот протест на вработените во Омбудсманот, рече дека Народниот правобранител и службата се специфична служба.
„Тие извршуваат работни задачи по претставки на граѓаните и на вработените во јавниот сектор. Ги заштитуваат нивните интереси и не е логично да бидат врзани во Закон за административни службеници“,
рече Деаноски.
Како што истакна тој, нивната работа не е административна и не можат да бидат поврзани со тој закон.
„Со години го чекаме носењето на Законот за службата и со години сме игнорирани од власта. Не може со оваа проблематика на работа да имаат ваква висина на плати. Во 1998 година, висината на платите биле на ранг на судиите и тоа не е чудно и не треба да биде чудно, односно службата е еднаква на судиите во Основните судови“,
кажа Деаноски.
На прашањето колку синдикати ќе им се приклучат на најавениот протест во петок, Деаноски рече дека ќе бидат заедно со Независниот синдикат на судската администрација и оти имаат испратено покани до сите синдикални организации.
„Се надеваме дека ќе има големо присуство бидејќи на вработените во правосудството и државната управа веќе им е дојдено преку глава“,
додаде тој.