Во денешното обраќање на премиерот Христијан Мицкоски, во рамките на одбележувањето на 2 Август – Илинден во Меморијалниот центар АСНОМ во Пелинце, тој меѓу другото порача дека Илинден не е само датум, туку доказ дека постојат народи кои и покрај сите окупации и предавства, никогаш не можат да бидат покорени
Секоја генерација има свој Илинден. Некои се бореле против империи, некои се бореле за држава, некои ја бранеле слободата со оружје. Нашата генерација има поинаква, но не помалку тешка задача – да ја направи државата силна, просперитетна, праведна и повторно да ја направи земја во која луѓето веруваат дека вреди да се остане, да се работи, да се создава, да се основа семејство и да се гради иднината во својата татковина.
Ова беше дел од обраќањето на премиерот Христијан Мицкоски во рамките на одбележувањето на 2 Август – Илинден во Меморијалниот центар АСНОМ во Пелинце, во кој порача дека Илинден не е само датум, туку доказ дека постојат народи кои и покрај сите окупации и предавства, никогаш не можат да бидат покорени.
Битката на оваа генерација, се надоврза Мицкоски, е последната надеж за иднината на државата и последната линија и сила на отпор против многу неправди и многу погрешни одлуки донесени во минатото.
„Сетете се само пред неколку години какви беа односите на политичките сили. Колку граѓаните беа мајоризирани пред налетот на разноразни интереси на политичките елити тогаш на власт. Денес тие се длабоко во опозиција, распаднати помеѓу своите лични интереси и далеку од столчињата на власт кои ним им овозможуваа удобен живот. Тие фотелји на власт ги држеа не со поддршката од народот, туку со предавствата и отстапките кои ги правеа. Она што ме загрижува е што лидерите на опозицијата, наместо натпревар со идеи, концепти и предлози, создаваат блато составено од многу нихилизам, омраза, ширење епидемија од дефетизам, како супститут на квалитетна понуда. Не паѓајте во замката на талогот кој тие го создаваат. Ве молам внимавајте и не му верувајте на тој талог од неуспеси, цинизам и мразење на сè што е успешно“,
порача, меѓу другото, Мицкоски во своето обраќање.
Во оваа смисла, премиерот кажа дека никогаш нема да го прифати однесувањето на претходната власт и направените отстапки за прашањата кои се блокада на патот на земјава кон Европската Унија, велејќи дека тој по ниту една цена нема да го разочара народот и да прави предавства на штета на државата и граѓаните.
„Денес не се води само политичка, економска и битка за нови инвестиции, повисоки плати, подобри училишта, модерни болници или нови патишта. Денес се води битка за тоа дали ќе дозволиме стравот да стане посилен од надежта, цинизмот да стане погласен од чесноста, лагата да стане повлијателна од вистината, омразата да стане поголема од љубовта кон татковината. Има нешто поопасно од сиромаштијата и економската криза – моментот кога еден народ ќе престане да верува во себе и кога ќе почне да мисли дека секој обид е однапред осуден на неуспех. Тоа е најопасниот отров што може да влезе во едно општество. И тој отров го шират една иста група луѓе кои, за разлика од напатениот народ, секој викенд се на јахти и договараат и се нудат за нови отстапки. Тој отров тивко ја убива енергијата на народот, волјата да се создава, желбата да се остане. Ја убива довербата меѓу луѓето. И на крајот ја убива надежта. А народ без надеж никогаш не може да биде голем“,
додаде Мицкоски.
Затоа, додаде тој, задачата на оваа власт не е само управување со институциите, туку враќање на довербата и чувството дека државата им припаѓа на граѓаните, со истовремена борба против криминалот, неправдата и против секој што сака да ја убие вербата.
„Ниту еден Илинден не бил лесен. Ниту една голема победа во историјата не дошла без жртви, трпение и без истрајност. Затоа нема да се откажеме. Наша должност е еден ден идните генерации со истата почит да зборуваат за времето во кое живееме ние. Да кажат дека тоа била генерацијата која повторно ја исправила земјата“,
порача премиерот во своето обраќање.