Говорниците на протестот го искажаа својот револт бидејќи во предлог-буџетот кој е пред пратениците не е предвидено покачување на платите на вработените во овие институции. Тие од пред Собранието побараа од пратениците од сите политички партии, пред кои веќе е предлог-буџетот за следната година, да ги поддржат во нивните барања за покачување на платите
„Бараме плати за достоинствен живот“, „Европски плати за вас и за нас“ беа транспарентите кои ги предводеа стотиците вработени кои во организација на Синдикатот на работниците од управата, правосудните органи и здруженијата на граѓани (УПОЗ) денеска излегоа на протест пред Собранието.
На протестот имаше вработени во судската и јавнообвинителската служба, Фондот за здравство, од канцеларијата на Народниот правобранител, Државен завод за статистика, Секретаријат за европски прашања, Државен пазарен инспекторат, Управа за заштита на културно наследство, Агенција за филм, како и административни службеници од министерствата за информатичко општество и администрација, земјоделство, транспорт и врски, за животна средина и просторно планирање.
Говорниците на протестот го искажаа својот револт бидејќи во предлог-буџетот кој е пред пратениците не е предвидено покачување на платите на вработените во овие институции. Тие од пред Собранието, побараа од пратениците од сите политички партии, пред кои веќе е предлог-буџетот за следната година, да ги поддржат во нивните барања за покачување на платите.
Претставниците на синдикатите упатија и остри критики до вицепремиерот за економски прашања Фатмир Битиќи поради изјавата дека судската администрација е виновна за одолговлекување на предметите и дека за покачување на нивните плати ќе треба да се скрати од пензиите и од оброците на студентите.
„Господине Битиќи немојте вие да се грижите што работи судската администрација и за времетраењето на постапките, вие грижете се за вашата работа. Времетраењето на постапките не зависи од судските службеници. Судските службеници бараат да бидат платени за она што го сработиле, бараме да ни се зголемат платите за еден пристоен живот, не бараме милостина“,
рече Јасмина Величкова, претседателка на Независниот синдикат на судската администрација.
Претседателот на УПОЗ, Трпе Деаноски, велејќи дека новата вредност на просечната плата за септември е 37 876 денари го повика вицепремиерот Фатмир Битиќи да дојде меѓу нив и да праша кој од овие вработени зема толкава плата, да праша колкави се нивните плати и како го преживуваат месецот.
„Доколку пратениците во Собранието не почнат да си ја работат својата работа и не застанат на страната на работниците кога ќе го гласаат новиот буџет да знаат дека се ближат избори, а вработените паметат. Покрај сите притисоци од директори, раководители, заменици министри и министри, тука сме дојдовме, а следниот пат ќе бидеме уште помногубројни“,
рече Деаноски.
Горан Ристески, претседател на Независниот синдикат на државната администрација, беше дециден: „Бараме европски плати за нив, европски плати за нас“.
Рече дека се подготвени низ дијалог и преговори да го решаваат проблемот.
Демонстрантите од пред Собранието се упатија кон Министерството за правда, а потоа продолжија пред зградата на Владата.
Од синдикалната организација на Судскиот совет на Република Северна Македонија денеска го повторија барањето да им бидат вратени додатоците на плата, укинати од март годинава.
Претседателот на Конфедерацијата на слободни синдикати на Македонија, Благоја Ралповски, посочи дека додатоците на плата кои што им следуваат согласно Колективниот договор, биле укинати во март годинава и дека преговорите за мирно решавање на спорот истекуваат на 3 или 4 декември, по што ќе следува генерален штрајк.
„Како што е во целото правосудство додатоците на плата се укина заради немање на доволно финансии во Судскиот буџетски совет заради покачување на платите на судиите. Но, од друга страна вината, исто така, ја насочуваме и кон Министерството за финансии кое не ги исплати додатните блок трансакции кон Судскиот буџетски совет, иако со Буџетот од 2023 година беа обезбедени“,
изјави Ралповски.
Според Ралповски, Владата неколку години наназад се обидува да ја деградира јавната администрација. Не сме криви ние што работиме во јавната администрација, туку тие што ја раководат јавната администрација.
„Ги повикуваме да седнат во Парламентот и додека се носи буџетот да изнајдат пари, да им го дадат заслуженото на јавната администрација“,
рече Ралповски.
Пред Министерството за здравство на протест денеска беа од Независниот синдикат на здравствени работници. Тие ги повторија своите барања за зголемување на платите за 30 отсто, нов колективен договор, бенефициран работен стаж, зголемување на инфективниот додаток од 1 на 4 отсто и трансформација на определено работно време со неопределено.