Министерството за труд и социјална политика соопшти дека ги продолжува консултациите за иницијативата недела да биде прогласена за неработен ден.
„Согласно прифатената иницијатива на Владата, недела да биде неработен ден и задолжувањето како Министерство за труд и социјална политика да изготвиме законско решение, изминативе денови имаме интензивни работни средби со претставници на сите засегнати страни. Синдикатите, стопанските комори, Организација на работодавачи со кои заедно со претставници од министерствата за економија, финансии, информатичко општество, разговаравме и ги отворивме сите прашања, со цел изнаоѓање на најприфатливо и најиздржано решение“,
напиша министерката за труд и социјална политика Јагода Шахпаска на својот фејсбук-профил по средбата со претставници на Независната угостителска комора.
Од Министерството за труд потсетуваат дека оваа иницијатива е со цел денот недела биде ден за семејството, но ќе има исклучоци за дејностите кои се од витално значење и од кои зависи функционирање на општеството.
Во контекст на дебатата меѓу работниците и газдите, дали недела треба да биде неработен ден, „360 степени“ обезбеди податоци од УЈП за тоа колку пари се трошат во поединечни денови од викендот. Според добиениот примерок, најмногу пари се трошат во сабота, а речиси двојно помалку во недела.