Алтернативните мерки имаат и позитивно влијание врз локалната заедница, наспроти ефективните казни затвор и условните осуди со кои многу често постои поголем ризик осуденото лице да се јави како повратник, односно да го повтори кривичното дело
Вкупно 441 лице изминатите две години добиле „втора шанса“ по сторено кривично дело за кое им била пружена можноста наречена „алтернативна мерка“.
Согласно Кривичниот закон, алтернативните мерки кои може да се изречат, покрај казните и ефективната мерка затвор се: условна осуда, условна осуда со заштитен надзор, условно прекинување на кривичната постапка, општокорисна работа, судска опомена и куќен затвор.
Алтернативните мерки кај нас се врамени во Законот за пробација, донесен во 2015 година, со кој се уредуваат пробациските работи и постапката за извршување на алтернативните мерки. Оттогаш до 2020-та година, пробациска мерка е изречено за 441 лице. Најмногу од нив се од во Скопје, а најмалку во Штип.
Целта на алтернативните мерки е да не се примени казна за полесни дела кога тоа не е нужно и кога може да се очекува дека целта на казнувањето може да се оствари со предупредување со закана на казна, како што е условната осуда, само предупредување, односно судска опомена, или, со мерки на помош и надзор на однесувањето на сторителот на слобода.
„Дополнителна позитивна страна од алтернативните мерки е тоа што лицата, условно кажано осудени за полесни кривични дела и со помали казни, дополнително го намалуваме ризикот од криминална инфекција во затворите, заради тоа што, не често се случува лице за полесно кривично дело, да влезе со мала казна, а да излезе поопасно и безбедносно поризичен да е по издржување на казната, отколку пред тоа“,
вели за МИА, Марјан Спасовски, директор на Управата за извршување на санкции.
Во однос на прекршувањето на пробациските мерки, тој вели дека бројката достигнува едвај пет проценти.
Ресоцијализација и реинтеграција
Од Хелсиншкиот комитет за заштита на човековите права велат дека иако Законот за пробација започна да се применува во 2016 година, во пракса не заживеа, односно судовите многу ретко изрекуваат алтернативни мерки на обвинетите лица.
„Оваа година на територијата на целата држава се отворија повеќе локални пробациски канцеларии, па оттука, очекуваме судиите повеќе да ги употребуваат одредбите од Законот за пробација и да соработуваат со пробациските работници при утврдување на видот и висината на кривичната санкција на обвинетите лица“,
велат од Хелсиншки.
Според нив, алтернативните мерки не само што ќе придонесат до подобра реинтеграција на осудените лица, туку и ќе доведат до намалување на пренатрупаноста во затворите, а општокорисната работа како алтернативна мерка ќе има и позитивно влијание врз локалната заедница, наспроти ефективните казни затвор и условните осуди со кои многу често постои поголем ризик осуденото лице да се јави како повратник, односно да го повтори кривичното дело.