На средбата со заменик-шефот на канцеларијата на ЕУ во Скопје присустувале седуммина од вкупно осум поранешни пратеници на ВМРО-ДПМНЕ кои гласаа за уставните измени
Заменик-шефот на Делегацијата на ЕУ во земјава, Џулијан Васало, денеска се сретнал со независната група пратеници.
Фотографија од средбата е објавена на фејсбук страницата на Делегацијата, со известување дека ЕУ им оддава признание на независните пратеници за нивната конструктивна поддршка за законот за јавното обвинителство.
Еврокомесарот за проширување Оливер Вархеји, како штое наведено во објавата, се сретна со групата минатиот месец, нагласувајќи дека усвојувањето на законот за ЈО би испратило сигнал за силна посветеност на реформите пред земјите-членки на ЕУ да одлучуваат за отворање пристапни преговори.
На фотографијата од средбата не е присутна пратеничката Елизабета Канчевска Милевска, која беше назначена за координатор на независната пратеничка група, а за која неофицијално има информации дека нема да го поддржи законот за ЈО. Поради тоа што сега е доведена во прашање поддршката од сите осум пратеници кои гласаа за уставните измени, што произлегоа од Преспанскиот договор, неизвесно е како ќе се обезбеди потребното двотретинско мнозиство за законот за ЈО. Неизвесна е и поддршката од Алијансата на Албанците која денеска поднесе амандман за интервенција во членот кој предвидува снимките од прислушуваните разговори во иднина да не бидат основа за покренување обвинение.
Во соопштението што независните пратеници го објавија во неделата стои дека „отпишувањето“ на „бомбите“ како основа за покренување обвиненија на нивна сугестија е внесено во новата верзија на законот за ЈО.