Само за билборди во кампањата за предвремените парламентарни избори отидоа речиси пола милион евра, пишува Призма во најновата анализа
Оваа изборна кампања ја одбележа тоа што немаше големи митинзи и партиски настани заради заштита од коронавирусот. Сепак, партиите и коалициите ги искористија сите други можности што им стојат на располагање за да се рекламираат.
Еден од нив, покрај социјалните мрежи, беше рекламирањето преку фирмите што стопанисуваат со закуп на билборди и рекламни паноа.
Извештаите што двете компании „Алцент медиа“ и тетовската „Скрим медиа“ ги доставиле до државните ревизори за да ги наплатат парите за рекламирање на партиите чинат пола милион евра, односно 440 илјади евра со вклучен ДДВ.
За билбордите низ сите шест изборни единици, пишува Призма, повеќе фактурирала „Алцент медиа“ (приближно 268 илјади евра) бидејќи имала и повеќе закупен простор, а „Скрин медиа“ треба да наплати приближно 171 илјада евра.
Во нив може да се прочита дека еден дел од износите е веќе наплатен, а кај друг дел сè уште има побарувања.
Судејќи според досегашната ажурност на менување на содржините на билбордите, „честењето“ екстра денови за реклама на партиите ќе потрае уште.
Овие две фирми, вкупно за сите партии и коалиции издале рекламен простор на 599 билборди и паноа. Од партиите и коалициите што влегоа во парламентот, најмногу рекламен простор закупиле ВМРО-ДПМНЕ и коалицијата „Обнова за Македонија“ (246 билборди), а потоа СДСМ со коалицијата „Можеме“ (191).
Трета е ДУИ со 53, потоа Левица (20), па ДПА (14) и најмалку од парламентарните партии се рекламирала коалицијата „Алијанса – Алтернатива“ (11 билборди).
Во анализата на Призма се наведува дека зависно од локацијата и од видот на закупениот билборд варираат и единечните цели – се плаќало од 5 000 денари до над 5 000 евра за закупен билборд.
Билбордот во центарот на Скопје, во близина на соборниот храм „Свети Климент Охридски“, ВМРО-ДПМНЕ и коалицијата го закупиле по цена од 335 883 денари, односно приближно 5 400 евра. ТОа е најскапиот закупен билборд од оваа коалиција во Скопје. Најниската сума, пак, наведена во извештајот е 5 562 денари за реклама и со неа треба да се платат неколку билборди во центарот на Скопје.
СДСМ и коалицијата го закупиле најскапиот билборд на булеварот Партизанска кон мостот Обединети нации односно кон Ѓорче Петров. Чини 191 425 денари, или 3 112 евра.
Целосната анализа на Призма можете да ја прочитате ТУКА.