Матичните лекари ќе имаат една од најзначајните улоги за процесот на вакцинација против ковид-19, особено за првата фаза да тече успешно.
Како што пишува „Призма“, засега сè уште не е до крај јасно како точно ќе се одвива процесот на вакцинација, но, повикувајќи се на информациите од министерот за здравство Венко Филипче, досега се пријавени 85 илјади граѓани преку vakcinacija.mk и преку матичните лекари.
Рубина Андоновска, матична лекарка од Скопје, за „Призма“ појаснува дека на електронска пошта ѝ стигнала листа со сите нејзини пациенти што имаат над 70 години. Таа ги проверила во својот систем и заклучила дека податоците се совпаѓаат. Таа и колегите за неколку дена им се јавиле на сите 350 пациенти постари од 70 години и ги прашале дали сакаат да се вакцинираат.
„Зборувавме со сите и по половина час. Со некои се убедувавме. Ние и онака имаме премногу работа и сега плус ова треба да го извршуваме, ама мислам дека нема подобар начин. Ние им ја знаеме историјата на болести на нашите пациенти и можеме заедно со нив да донесеме одлука дали да се вакцинираат, ако во случај имаат некои ризици“,
вели Андоновска за „Призма“.
Таа вели дека не се водела според податоците од vakcinacija.mk, туку решила да ги контактира сите 350 пациенти постари од 70 години. Таа очекува во следниот период списокот да биде прочистен и сите што не сакаат да се вакцинираат да бидат отстранети. А оние што сакаат да примат вакцина да добијат точна информација кога и каде ќе се вакцинираат.
При евиденцијата на vakcinacija.mk, луѓето не добиваат повратен одговор дека се регистрирани и немаат можност да проверат дали некој податок го имаат погрешно внесено. Доколку некој се сомнева дека згрешил, може повторно да се регистрира.
„Важно е матичниот број да е точен, имејлот и телефонот не се толку важни. Матичните лекари знаат како да ги контактираат своите пациенти“,
додава лекарката.