Од МВР велат дека покрај новоприведените полицајци и војници, идентификувани се и повеќе лица кои пукале со огнено оружје, а биле извршени и седум претреси, при што е одземено разновидно оружје се кое се пукало на веселбата
Прилепските полицајци привеле уште двајца полициски службеници и двајца професионални војници по пукањето со огнено оружје на семејна веселба во прилепското село Дебреште. Ова денеска го соопштија од Министерството за внатрешни работи, откако вчера беше приведен нивен колега од полициското одделение Ропотово поради сомнение за сторено кривично дело – предизвикување општа опасност.
„Идентификувани се повеќе лица кои пукале со оружје на веселбата и за сите ќе бидат поднесени соодветни поднесоци. Двајца од нив се полициски службеници Н.И. (28) и Е.И. (28) од ОВР Прилеп, а двајца се професионални војници Б.Х. (26) и И.Р. (23), додека останатите се жители од селата Дебреште и Саждево, Крушевско“,
се вели во соопштението од МВР.
Од МВР велат дека се извршени и седум претреси, при што е одземено разновидно оружје кое е употребено за ова кривично дело.
На командирот на полициското одделение Ропотово, Е. Р., од МВР велат дека му е одреден куќен притвор од осум дена, а за полициските службеници Н. И. (28) и Е. И. (28) постапува Одделот за внатрешна контрола, криминалистички истраги и професионални стандарди и за нив ќе биде поведена дисциплинска постапка и соодветна пријава до Основното јавно обвинителство (ОЈО).
Случајот со пукањето на семејна веселба во селото Дебреште, вчера го обелодени пратеникот на ВМРО-ДПМНЕ, Драган Ковачки, кој освен што го посочи „сторителот“ како полициски командир, ја обвини и власта за неодговорност.