Украинската гранична служба (ДПСУ) тврди дека платеници на „Вагнер“ пристигнале во Белорусија од соседна Русија. Неофицијално, со конвој од околу 60 возила „Вагнеровци“ се префрлиле во Белорусија рано утринава
Oд граничната служба на Украина велат дека тече проценката колку „милитанти“ има во Белорусија, која исто така ја дели границата со Украина, како и за нивната точна локација и цели.
Неофицијално, со конвој од околу 60 возила „Вагнеровци“ се префрлиле во Белорусија рано утринава.
Изминатиот месец, бунтот на „Вагнер“ го оспори авторитетот на рускиот претседател Владимир Путин, пишува Би-би-си.
Со договор се стави крај на 24-часовниот бунт, а припадниците на платеничката група запреа на 200 километри пред Москва.
Според договорот, на борците на „Вагнер“ им било кажано дека можат да се приклучат или на редовната руска армија или да одат во Белорусија, близок сојузник на Русија. На лидерот на „Вагнер“, Евгениј Пригожин, исто така му беше понудена преселба во Белорусија, но неговата моментална локација не е позната.
„Вагнер“ е руска приватна војска составена од платени борци – од кои многумина беа регрутирани од руските затвори. Тие водеа дел од најкрвавите битки откако Русија ја започна инвазијата на Украина.