На средбата се очекува да присуствуваат американскиот државен секретар Марко Рубио, американскиот советник за национална безбедност Мајк Волц и пратеникот на Белата куќа за Блискиот Исток, Стив Виткоф. Непознато е со кои руски претставници ќе се сретнат
Украинскиот претседател Володимир Зеленски рече дека Украина не е поканета на разговорите во Саудиска Арабија и дека за него би било чудно да разговара со претставници на САД и Русија ако Киев претходно не се консултира со своите партнери
Високи функционери од администрацијата на американскиот претседател Доналд Трамп во наредните денови ќе се сретнат со руски претставници во Саудиска Арабија, со цел да се отпочнат разговори за ставање крај на речиси тригодишната војна во Украина, јави Ројтерс цитирајќи висок американски функционер.
Според најавите, во Саудиска Арабија ќе отпатуваат американскиот државен секретар Марко Рубио, американскиот советник за национална безбедност Мајк Волц и пратеникот на Белата куќа за Блискиот Исток, Стив Виткоф. Засега е непознато со кои руски претставници ќе се сретнат.
Запознаен извор потврди дека разговорите меѓу претставници на САД и Русија во Саудиска Арабија ќе се одржат.
Претседателот на Комитетот за надворешни работи на Претставничкиот дом на САД, републиканецот Мајкл Мекол, во изјава за Ројтерс вели дека и украинскиот претседател Володимир Зеленски е поканет да учествува на средбата. Вели дека целта е да се договори средба меѓу Трамп, Путин и Зеленски за да се стави крај на конфликтот.
Украинскиот претседател Володимир Зеленски, пак, рече дека Украина не е поканета на разговорите во Саудиска Арабија и дека за него би било чудно да разговара со претставници на САД и Русија ако претходно Киев не се консултира со своите стратегиски партнери.
„Колку што се сеќавам, Русија не е наш стратегиски партнер“,
рече Зеленски пред новинарите на Минхенската безбедносна конференција.
Специјалниот претставник на Доналд Трамп за Украина, Кит Келог, вчера изјави дека Европа ќе биде исклучена од мировните разговори помеѓу САД, Русија и Украина.