Министерот за здравство Венко Филипче на прес-конференција го претстави протоколот на Комисијата за заразни болести во врска со одржувањето на изборите. Строго придржување кон мерките за заштита, како носење маски и ракавици, држење дистанца и дезинфекција ќе треба да има и во текот на кампањата и на денот на изборите за кој се препорачува, а ако е можно, периодот на гласање да се зголеми за 2 часа (вообичаено гласањето трае од 7 до 19 часот).
Препораките се подготвени по барање на претседателот Стево Пендаровски кај кого во вторникот се одржа лидерска средба, а лидерите се договорија да се побара протокол и процена од Комисијата за заразни болести, мислења од ДИК и од ОБСЕ/ОДИХР, па наредната недела повторно да се сретнат за да разговараат за датум за избори.
„Сите лидери на средбата се изјасниле дека здравјето е на прво место и затоа очекувам дека сите партии ќе го почитуваат овој протокол. Тој произлегува од генералните препораки кои се во сила и ќе останат во наредниот период“,
рече Филипче.
Протокол за предизборна кампања
Одржување на сите активности во кампањата и пред неа, посочи министерот, треба да се одвиваат исклучително почитувајќи ги физичката дистанца од 1,5 до 2 метра, миење и дезинфекција на рацете, носење заштитна маска или прекривка на устата и носот за време на сите партиски активности во затворени простории, но и на отворени кога нема да може да се држи дистанца.
Собири: Сите собири што се одржуваат на отворен и во затворен простор мора да се почитуваат мерките и да се користи разглас за да се избегне концентрација на повеќе лица на ист простор;
Кампања од врата на врата: Мора да се носи заштитна опрема, да се држи дистанца од соговорниците, да не се влегува во домаќинствата туку само на врата или во дворови;
Активности во штабови: Да се спроведуваат активностите на отворено, ако се внатре да се почитуваат сите мерки, да не траат подолго од 2 часа и потоа да се проветрува, да се врши секојдневна дезинфекција;
Пунктови: На пунктовите за рекламен материјал да не се собираат поголем број граѓани, на еден штанд да има најмногу двајца активисти;
Партиски превоз: Да се спроведува со средства за јавен превоз, капацитетот на возилото да биде 50 проценти искористен и сите внатре да носат заштитна опрема, а превозниците да обезбедат средства за дезинфекција
Протокол за денот на гласање
– Членовите на избирачките одбори и набљудувачите да носат заштитни маски и ракавици;
– Прозорците да бидат отворени или да се проветрува на секој час;
– Да се дезинфицираат рацете;
– Гласачите да чекаат на дистанца од 2 метра, при влегување на избирачко место да се дезинфицираат рацете, да се носи заштитна опрема, при давањето лична карта кратко да се тргне маската за идентификација, по гласање повторно да ги дезинфицираат рацете;
– Во просторијата да нема повеќе гласачи од бројот на боксови за гласање;
– Ако може, да се зголеми времето на гласање за два часа за да се избегне метеж.