Во полициската акција кај Ресен се уапсени тројца албански државјани и запленети се 65 килограми марихуана во вредност од 200 илјади евра
Тројца државјани на Албанија се уапсени вчера кај Ресен во акција на полицијата за спречување меѓународен канал за транспорт на наркотична дрога од Албанија, низ Северна Македонија, до Грција. Како што соопштија од МВР, во акцијата се запленети 65 килограми марихуана во вредност од 200 000 евра.
Како што соопштија од МВР, на 18 мај полициски службеници од Одделот за криминалистичка полиција, Сектор за недозволена трговија со дрога, оружје и опасни материи, во заедничка акција со Одделот за сузбивање организиран и сериозен криминал, Единицата за брзо распоредување и ОВР Ресен, се лишени од слобода К.К. (25), М.Ф. (28) и Ф.Б. (42), сите од Албанија. Со тоа е пресечен меѓународен канал за транспорт на наркотична дрога од Албанија низ Северна Македонија, а наменета за Грција, како крајна дестинација.
Вчера, во утринските часови, на регионалниот пат од Трпејца кон Стење, преку Националниот парк Галичица, биле сопрени две патнички возила марка „мерцедес“, со албански регистарски ознаки, во кои била дрогата. При извршен преглед на возилата, од кои едното било управувано од К.К., а совозач бил М.Ф., додека второто возило го управувал Ф.Б., биле пронајдени и одземени три големи торби со марихуана, спакувана во 44 пакувања.
Албанските државјани се приведени, а по насока на обвинител од Основното јавно обвинителство – Ресен дрогата е предадена на вештачење, при што било утврдено дека станува збор за вкупно 65 килограми марихуана, а против трите лица ќе биде поднесена кривична пријава до Основното јавно обвинителство за гонење организиран криминал и корупција, по член 215 од Кривичниот законик.