За време на посетата на семејството на починатиот Гоцевски, премиерот порачал дека неговиот подвиг потсетува оти храброста и човечноста живеат во луѓето од оваа земја
Премиерот Христијан Мицкоски информира дека денеска бил во посета на семејството на Иле Гоцевски – возачот на кочанската Итна медицинска помош, кој почина по напорниот ден во неделата на 16 март превезувајќи повредени лица од пожарот во дискотеката „Пулс“ до здравствените установи надвор од Кочани.
За време на посетата на семејството на починатиот Гоцевски, премиерот порачал дека неговиот подвиг потсетува оти храброста и човечноста живеат во луѓето од оваа земја.
„Тоа се нашите херои! Иле замина тивко, но зад себе остави пример кој нема да го заборавиме. Мојата почит и поклон за него. Почит и до сите што несебично им служат на граѓаните. Вечна ти слава, Иле“,
напиша премиерот во објава на Фејсбук по посетата на семејството на починатиот возач на Итната помош.
Возачот на Итната медицинска помош од Кочани, Иле Гоцевски (42), почина утрото на 17 март откако цела ноќ превезувал повредени од пожарот во кочанската дискотека „Пулс“ во болниците надвор од градот. Во изјава за дел од медиумите, неговите колеги од Итната помош тогаш изјавија дека Гоцевски цела ноќ превезувал повредени од пожарот во дискотеката иако претходно се пожалил дека не се чувствува добро. По повеќечасовна работа отишол дома да одмори, но повеќе не се разбудил.
Министерот за здравство Арбен Таравари пред два дена најави дека на Гоцевски постхумно ќе му биде оддадено признание за направеното дело.