Излегувањето во вселенското пространство на рускиот космонаут Олег Артемиев беше прекинато поради проблеми со неговиот скафандер, објави НАСА. Контролата на мисијата на Артемиев му наредила да се врати во Меѓународната вселенска станица (МВС) откако проблемот бил забележан.
Детали сѐ уште не се соопштуваат, но според американската вселенска агенција НАСА, забележана е „мала флуктуација“ во батеријата на вселенскиот костим.
Космонаутот потоа безбедно се вратил во МВС. НАСА соопшти дека Артемиев не е во опасност и покрај непредвидената појава. Тој и неговиот колега Денис Матвеев работеа на опремување на роботската рака на Европската вселенска агенција (ЕСА) со камери и друга опрема.
Иако се чини дека станува збор за помал инцидент, сепак, тоа потсетува на непријатни спомени… Италијанскиот астронаут Лука Пармитано доживеа проблем со скафандерот за време на две вселенски излегувања во јули 2013 година, а првото вклучуваше „протекување“ кое мина незабележано.
Поради тоа, НАСА тогаш привремено ги суспендираше сите неитни излегувања во вселенското пространство.