Се очекува претседателот Стево Пендаровски во 18 часот да ја соопшти својата одлука дали ќе прогласи вонредна состојба, односно дали ќе го прифати предлогот на техничката влада, кој прво беше испратен во парламентот.
Најавите се дека Пендаровски ќе прогласи вонредна состојба, откако синоќа изјави дека, со оглед на развојот на ситуацијата со коронавирусот, е можна промена на првичната оценка дека не треба да се избрзува со тој чин. Исто така, денеска повеќето политички лидери настапија со ставови дека ситуацијата налага да се прогласи вонредна состојба, во треање од 30 дена, наспроти различните размислувања на вчерашната лидерска средба.
Предлогот на владата за вонредна состојба, веднаш по попладневната прес-конференција на спикерот Талат Џафери, стигнал во парламентот. Џафери, како што најави, веднаш ќе му го препрати предлогот на шефот на државата, со оглед на тоа што нема услови да се состане распуштениот парламент.