Од СДСМ, пак, велат дека треба да се остави простор за дијалог, затоа што не се очекува билатералните спорови да бидат камен на сопнување на патот на понатамошната интеграција на земјата во ЕУ
Со заедничка декларација за потврда на македонскиот идентитет македонскиот парламент да се спротистави на бугарскиот меморандум, предлага пратеникот на ВМРО-ДПМНЕ Антонијо Милошоски, претседател на собраниската Комисија за надворешни работи и поранешен шеф на дипломатијата.
Тој смета дека Собранието треба да усвои заедничка декларација во која идентитетот на македонскиот народ, посебноста на македонскиот јазик и сите други културни и национални обележја би биле заеднички потврдени и со самото тоа, како што вели, афирмирани како дел од европските вредности на културните и националните идентитети на овој континент.
„Европа и нејзиното мото ’обединети во различностите’ би требало да важи и за Македонија и сметаме дека за тие прашања не би требало да има преговори. Напротив тие прашања треба да бидат поддржани од сите политички партии во Македонија“,
рече Милошоски.
Портпаролот и пратеник на СДСМ Костадин Костадинов денеска, во однос на објаснувачкиот меморандум од Софија, рече дека треба да се остави простор за дијалог.
„Како сериозни политичари и како сериозна партија секогаш сме давале шанса по пат на дијалог, по пат на обемни разговори да ги затвораме сите крупни прашања што ги тиштат граѓаните на нашата држава, но и граѓаните на државите со кои сме имале претходни тешки спорови. Она што е најважно е дека еве и јас од овде сум Македонец, јас од овде зборувам македонски јазик, вие поставувате прашања на македонски јазик и секако и најважно согласно договорите, признаени од цел свет. Јас искрено сум убеден дека камен на сопнување во нашиот интегративен пат кон ЕУ нема да бидат билатерални спорови, во случајот со Бугарија“,
репче Косдатдинов.