Отфрлајќи ја идејата на Алтернатива, премиерот нагласи дека односите во земјава се регулирани со Охридскиот рамковен договор од 2001 година, поради кој, како што кажа, денес Северна Македонија е пример за соживот, за остварување на првата на сите етнички заедници и за заштита на правата на помалите етникуми
Премиерот Димитар Ковачевски и лидер на СДСМ, Димитар Ковачевски, денеска го повтори ставот на неговата партија за предлогот на опозициската Алтернатива за формирање заедница на албански општини во Северна Македонија, по моделот што е предвидено да се формира ваква Заедница на српски општини (ЗСО) во Косово.
Отфрлајќи го предлогот на Алтернатива како неприфатлив и несериозен, Ковачевски нагласи дека оние што го заговараат се или неинформирани или, како што рече, не ги разгледале договорите што ги решаваат идентитетските прашања на Балканот.
„Таквиот предлог е и неевропски и неамерикански така што, оние што го заговараат ќе треба малку повеќе да се задлабочат во тоа на кој начин се решени проблемите во Северна Македонија, а на кој начин ќе бидат решени проблемите во Косово, нормално преку заемен договор меѓу Косово и Србија со посредништво на САД и ЕУ“,
рече премиерот Димитар Ковачевски одговарајќи на новинарски прашања по доделувањето на социјални станови во Гостивар.
Коментирајќи ја идејата на Алтернатива, Ковачевски нагласи дека односите во земјава се регулирани со Охридскиот рамковен договор од 2001 година, поради кој, како што кажа, денес Северна Македонија е пример за соживот, за остварување на првата на сите етнички заедници и за заштита на правата на помалите етникуми.
„Ние овде заедно сме си ги уредиле правата како ќе живееме и како ќе напредуваме и врз основа на тоа сме станале земја членка на НАТО, земја која преговара со ЕУ и безбедноста и стабилноста на нашата држава е на толку високо ниво изградена по 2001 година што земја депонент на договорите од Берлинскиот процес, кој ги потпишаа сите земји од Западен Балкан се депонирани во нашето Министерство за надворешни работи“,
рече премиерот уште еднаш повторувајќи оти предлогот на Алтернатива го смета за неприфатлив.
Политичката партија Алтернатива, која неодамна реши да излезе од власта и да премине во опозиција, викендов преку соопштение повика да се започне иницијатива за формирање заедница на албански општини во Северна Македонија, по моделот што е предвидено да се формира ваква Заедница на српски општини (ЗСО) во Косово.
Ваквиот предлог како неприфатлив го оценија владејачките СДСМ и ДУИ, за кои оваа идеја е патетична, антиамериканска и антиалбанска, а според нив, ѝ служи на Алтернатива во собирање на дневнополитички поени.
Од ЛДП, пак, рекоа дека ваквата идеја само создава групирања и поделби и се коси со вредностите за либерално-демократско општество.
Единствено поддршка даде Изет Меџити од „огнената група“ во ДУИ велејќи дека ако ваквиот модел се примени во Косово ќе има домино-ефект и во регионот.