И покрај немањето никаков одговор од опозициската партија, од Министерството за правда најавуваат дека во најкус можен рок ќе се формира работната група што треба да го изготви новиот Изборен законик
Работната група која треба да изготви предлог за нов Изборен законик сè уште не е формирана. Од Министерството за правда најавуваат дека тоа ќе се случи најскоро, но реагираат дека ВМРО-ДПМНЕ одбива да номинира свој претставник во оваа група за што, велат, ја известиле и меѓународната заедница.
„Ве информираме дека и покрај испратениот допис до ВМРО-ДПМНЕ да предложат свој претставник во работната група за подготовка на нов Изборен законик, како и поканата претседателот на работната група да биде по нивен предлог, досега до Министерството за правда нема пристигнато никаков одговор, ниту позитивен ниту негативен. За ова се известени сите меѓународни фактори и организации. Работната група која ќе треба да го подготви новиот Изборен законик ќе се формира во најкус можен рок. Министерството за правда смета дека во нејзината работа треба да учествува и ВМРО-ДПМНЕ“,
велат од Министерството.
Кренар Лога, кој стана министер за правда на крајот на февруари, набргу потоа ја повика опозициската партија да номинира свој член и претседателот на работната група да биде од нејзините редови. Неговата цел, рече тој, е да имаме нов Изборен законик пред следните избори.
„Мојата јасно зацртана цел е Изборниот законик да биде изготвен пред следните избори, а преку инклузивен процес да се гарантира правната сигурност со тоа што ќе се слушнат мислењата на сите политички партии. Затоа, ги повикувам сите политички партии со консензус да го донесеме Изборниот законик и да ги утврдиме изборните правила. Упатувам апел до ВМРО-ДПМНЕ како најголема опозициска партија да даде свој придонес и да номинира свој член во работната група. Согласен сум претседателот на работната група да биде нивен предлог“,
повика Лога во своето неодамнешно обраќање на конференцијата „Изборните реформи во Северна Македонија“ што на 14 март ја организираше Националниот демократски институт.
Работна група, која требаше да работи на подготовка на нов Изборен законик, формира и претходникот на Лога, Никола Тупанчевски, но таа не почна со работа бидејќи Беса и ВМРО-ДПМНЕ не именуваа свои претставници.
Лидерот на ВМРО-ДПМНЕ, Христијан Мицкоски, претходно повикуваше во Собранието, сите партии заедно да изгласаат една изборна единица, а потоа да се пристапи кон измени во Изборниот законик согласно препораките на ОБСЕ.