Пратеникот од СДСМ, Мартин Костовски, на комисиската седница рече дека кандидатката за уставна судијка Родна Живковска, која е предлог на ВМРО-ДПМНЕ, не е личност која нема допирни точки со политиката туку, напротив, таа е донатор на ВМРО-ДПМНЕ и додаде дека за уставни судии треба да се изберат професионални кадри кои немаат никаква врска со политички партии
Инаку, Комисијата за прашања на изборите и именувањата треба да се произнесе уште за осум предлог-судии во Уставниот суд, меѓу кои и универзитетската професорка Родна Живковска, откако вчера апелацискиот судија Фатмир Скендер го помина комисискиот филтер во Собранието за нов уставен судија
Откако вчера апелацискиот судија Фатмир Скендер го помина комисискиот филтер во Собранието за нов уставен судија, денеска Комисијата за прашања на изборите и именувањата ја продолжи расправата за предлозите на уставните судии. Пратениците денеска расправаат за кандидатурата на универзитетската професорка при Правниот факултет „Јустинијан Први“, Родна Живковска, која доаѓа како предлог од опозициската ВМРО-ДПМНЕ.
Пратеникот од СДСМ, Мартин Костовски, на седницата рече дека кандидатката за уставна судијка Родна Живковска, која е предлог на ВМРО-ДПМНЕ, не е личност која нема допирни точки со политиката туку, напротив, таа е донатор на ВМРО-ДПМНЕ.
„Професорката Родна Живковска е донатор на ВМРО-ДПМНЕ. На 14 февруари 2020 година таа уплатила 25 000 денари на сметката на ВМРО-ДПМНЕ“,
рече Костовски и додаде дека за уставни судии треба да се изберат професионални кадри кои немаат никаква врска со политички партии.
Како што додаде Костовски, е многу важно да се напомене дека нејзиниот син, Иван Живковски, е претседател на Советот на Општина Кисела Вода, а покрај тоа, како што истакна, склучил договор со ЈП „Лајка“ за адвокатски услуги што претставува судир на интереси.
Пратеникот Јован Јаулески од ВМРО-ДПМНЕ На седницата рече декa отсуството на пратеници од власта покажува дека повторно ќе бидат избрани и ќе ги поминуваат филтрите за уставни судии кандидатите предложени од власта.
Пратеникот од Демократскиот сојуз, Павле Трајанов, пак, укажа на потребата на реформи во целиот судски систем, а посебно околу поставеноста, дејствувањето и улогата на Уставниот суд. Посочи дека начинот на кој се води целокупната постапка е за дискредитација на предложените кандидати за уставни судии, а не за нивна афирмација.
Инаку, Комисијата за прашања на изборите и именувањата треба да се произнесе уште за осум предлог-судии во Уставниот суд, меѓу кои и универзитетската професорка Родна Живковска, за чија кандидатура пратениците во Комисијата расправаат денеска.
Освен предлогот Фатмир Скендер да биде избран за уставен судија, пратениците треба да ги разгледаат биографиите и на републичкиот јавен обвинител Љубомир Јовески и Тања Васиќ Бозаџиева, вработена во Министерството за правда како државен советник за граѓанско законодавство, предложени од владејачките партии. На предлог на ВМРО-ДПМНЕ, пак, треба да се разгледаат кандидатурите и на универзитетскиот професор Саво Климовски, судијата во пензија Бранко Секуловски, обвинителот Тодор Витларов, судијката од Управниот суд Весна Јовановска и Војислав Димовски, јавен обвинител од Основното јавно обвинителство во Охрид, предложени од ВМРО-ДПМНЕ.
Уставниот суд во моментов работи без четворица судии на кои им истече мандатот, од предвидени девет судии. Во нецелосен состав е околу една година откако кон крајот на мај лани им истекоа мандатите на тројца судии – Сали Мурати, Елена Гошева и Никола Ивановски. Кон средината на јануари годинава, пак, му заврши мандатот и на судијата Јован Јосифовски.