Според најави од Собранието, предлогот на опозицијата за самораспуштање денеска ќе биде отфрлен, затоа што е поднесен со старото име на државата. Џафери изјави за „360 степени“ дека најверојатно за утре ќе закаже седница за законот за ЈО
Парламентот денеска нема да носи одлука за распуштање, односно предлогот на пратеничката група на ВМРО-ДПМНЕ распуштањето да биде на 12 февруари нема да биде ставен на собраниска седница. Според најави од Собранието, овој предлог, веројатно, ќе биде отфрлен како неуставен, затоа што е поднесен со старото име на државата, наместо со новото уставно име Северна Македонија.
Наместо предлогот на ВМРО-ДПМНЕ, се очекува претседателот Талат Џафери да достави свој предлог за распуштање на парламентот, за што сè уште не е утврден конечен датум. Според наши информации, во Собранието моментно е во тек координација на Џафери со шефовите на пратеничките групи, со исклучок на ВМРО-ДПМНЕ која цело време не присуствува на овие средби бидејќи не го признава изборот на претседателот на парламентот. Треба да се утврди агендата на Собранието за наредните денови, односно кои се преостанатите закони што треба да се гласаат пред распуштањето на пратениците и распишувањето на изборите на 12 април. Проценките во парламентот се дека седницата за распуштање на законодавниот дом ќе се одржи најрано в петок, а најдоцна в недела.
Џафери во изјава за „360 степени“ потврди дека на дневен ред на седницата за распуштање на парламентот ќе ја стави одлуката што лично тој ја поднесе, а на која засега не е запишан датум кога ќе се распушти парламентот. За пленарната седница на која треба да се гласа за законите за јавно обвинителство и за Совет на јавни обвинители, Џафери вели дека може за утре да го закаже нејзиното продолжение.
„Сега заврши седницата на Комисијата за европски прашања. Чекам да ги добијам известувањата и ќе закажам седница, веројатно за утре“
вели Џафери.
За законот за одбрана, кој треба да се донесе со двотретинско мнозинство и за кој се поминати сите претходни процедури во парламентот, Џафери вели дека ќе закаже седница до распуштањето на парламентот, ако добие известување дека пратениците се усогласени.
Тој потврди дека имал координација, на која се разговарало за обврските што треба да се завршат пред распуштањето на парламентот.
Координаторот на пратеничката група на ВМРО-ДПМНЕ, Никола Мицевски, денеска побара од Џафери да закаже седница за распуштање на Собранието. Тој се повика на договорот меѓу политичките партии за одржување предвремени парламентарни избори на 12 април оваа година.
„Пратеничката група на ВМРО-ДПМНЕ веќе поднесе предлог-одлука за распуштање на Собранието на Република Македонија на 5 февруари и бараме таа денеска да биде ставена на одлучување пред пратениците. Одлуката беше поднесена поради сè поочигледните обиди на СДСМ да проба да избега од договорените избори, иако сите услови за одржување предвремени парламентарни избори се исполнети. Од друга страна, сведоци сме на обиди од страна на СДСМ и Зоран Заев да поставуваат некакви нови услови кои не се воопшто поврзани со одржувањето на изборите“,
изјави Мицевски.
Тој се повика на изјава на Талат Џафери според која Собранието мора да се распушти на 12 февруари,, со што би се испочитувале роковите предвидени со законот и Уставот.
„Џафери беше дециден во своите изјави и напомена дека дури ако треба тој како пратеник ќе поднесе предлог за распуштање на 12 февруари. Еве, денес, на 12 февруари, единствено што бараме е да остане доследен на своите изјави, да закаже седница на Собранието да ја ставиме предлог-одлуката за распуштање која ја поднесовме. Во спротивно ќе ѝ биде јасно на целокупната македонска јавност дека ова парламентарно мнозинство манипулира со граѓаните и дека се обидува да избега од договорот што беше постигнат од политичките партии“,
рече Мицкоски.