Шесте клучни области на стратегијата се – одржлива, иновативна и конкурентна економија, одржлив локален и регионален развој што обезбедува кохезија, демографска ревитализација, социјален и културен развој, сигурно, безбедно и отпорно општество, зелена трансформација, владеење на правото и добро управување
Со 70 гласа „за“, еден „против“ и без „воздржани“, пратениците попладнево ја усвоија Националната развојна стратегија за периодот 2024-2044 година. Поддршка за носење на документот дадоа и пратениците од владејачката ВМРО-ДПМНЕ и од опозицискиот СДСМ.
Шесте клучни области на стратегијата се – одржлива, иновативна и конкурентна економија, одржлив локален и регионален развој што обезбедува кохезија, демографска ревитализација, социјален и културен развој, сигурно, безбедно и отпорно општество, зелена трансформација, владеење на правото и добро управување.
Образложувајќи го текстот на документот, заменик-министерката за животна средина и просторно планирање, Ане Лашкоска, посочи дека основната идеја на Стратегијата е да овозможи континуитет во стратегиското планирање и конзистентен одговор на главните предизвици, без оглед на политичката ориентација. Како таков, овој документ, додаде Лашкоска, ги идентификува клучните предизвици и национални приоритети, особено имајќи го предвид стремежот за членство во ЕУ до 2030 година, како и заложбата за одржлив развој преточена во Агендата 2030.
„Националната стратегија во основа се темели врз три базични национални развојни цели: Зајакнување на конкурентноста на економијата преку функционален и иновативен екосистем, усовршување на вештините, знаењето, вклученоста и отпорноста на граѓаните, Модели на управување што се отворени, отчетни, сеопфатни и отпорни, способни да спречат и соодветно да реагираат, поттикнувајќи просперитет за сите општествени групи, како и Социјалната инклузија што подразбира подобрени социјални, здравствени и образовни услуги во насока на обезбедување корист за поединците, бизнисите и за општеството во целина“,
истакна заменик-министерката за животна средина и просторно планирање, Ане Лашкоска, образложувајќи го текстот.
Усвојувањето на Стратегијата го поддржаа и пратениците од СДСМ, посочувајќи оти одлуката за нејзино носење ги надминува политичките поделби и лични амбиции, отворајќи ја вратата за просперитет и развој на државата. Оваа Стратегија, порача пратеникот Фатмир Битиќи, не е на една влада или една партија, туку од сите нас, за сите нас.
„Над 14 000 граѓани од сите сфери и политички партии придоенсоа за создавање на документот. Овој документ успеа да ги обедини различните гласови и интереси. Ова е патот што ќе ја води земјава кон долгорочен развој. Покажуваме дека ги цениме различните мислења и дека сме заинтерсирани да ги интегрираме во заеднички план. Граѓаните очекуваат соработка, консензус и визија која ќе ги надмине тековните политички битки и поделби. Докажавме дка сме способни за компромиси и соработка, а компромисиот не е слабост, туку е израз на политичка зрелост и одговорност. Консензуалното усвојување ќе има и доглорочни политички импликаци, нема да помогне само да ги решиме економските предзвици, туку ќе ја зголеми довербата во политичкиот систем. Во Стратегијата лежат и вредности како инклузивност и солидарност, принципи со кои можеме да создадеме поефикасен и политички систем способен за дијалог дури и во време на поларизација“,
рече пратеникот Битиќи.
Дека Стратегијата е натпартиска, меѓуетничка, родово и социјално сеопфатна порача и пратеникот и експремиер Димитар Ковачевски, посочувајќи дека на нејзиното изготвување учествувале сите политички партии.
Опозициската ДУИ замери дека Стратегијата не била образложена од ресорниот министер или од премиерот и побара нејзино повлекување и коригирање, споменувајќи ги актуелните случувања со Уставниот суд за кои оценија дека прават тектонски измени кога се во прашање меѓуетничките односи.
„Вака значаен документ, независно дали поминал низ инклузивен процес, бара сериозен пристап, да се дебатира од премиерот или министерот кој го води ресорот, тие треба да дадат објаснување, имајќи ја предвид сериозноста во која се наоѓаат државата и регионот. Стратегиите не можат да ги опфатат сите прашања, ние дебатиравме на Комисија, имаше обиди да се каже дека беше подготвена од претходната власт, но треба да се направи разлика и да бидеме прецизни, зашто секоја власт има одговорност. Во оваа Стратегија се зборува за 20-годишен период, а знаете какви најави има од Уставниот суд. Во Стратегијата има добри работи и амбициозни проекти, но во политичкиот контекст сега, Уставниот суд е во офанзива на укинување на законите кои се однесуваат на етничкиот карактер“,
рече пратеникот Блерим Беџети од ДУИ.
Опозициската Левица, пак, оцени дека Националната стратегија е историски промашена, методолошки неточна и идеолошки изгубена. Оттаму забележаа дека низ годините, со промената на владејачките гарнитури, содржините на ваквите стратегии остануваат исти.
„Веројатно и оваа Стратегија е препишана, нема суштински план за подобрување на работите. Не знаев ниту дека е правена со учество на странски експерти, граѓани, невладини организации… Тоа е типичен пристап на граѓанскиот, невладин сектор каде доволно е само да се покаже инклузивноста за да се оправдаат парите од странските финансиери. Очигледно таква е ситуацијата. Ваков документ треба сериозно да се обмисли и на него треба да работат сериозни луѓе, а не ‘ојлевци-дојлевци’ кои немаат врска со стратешки документи“,
рече пратеникот Реџеп Исмаил од Левица.
Покрај усвојување на Националната стратегија 2024-2044, пратениците на денешната седница ја донесоа и Програмата за спроведување на Националната развојна стратегија за периодот 2024-2028 година.