Оттаму ги повика пратениците да не го поддржат законот и да одговорат на барањата на АСОМ за отпочнување дебата преку која заеднички ќе се дојде до вистинско, како што велат, европско законско решение за уредување на оваа област, без притоа да се загрозува иднината на десетиците илјади вработени во овој сектор
Во пресрет на денешната собраниска седница на чиј дневен ред повторно ќе се најде законот за игри на среќа откако указот на законот не беше потпишан од претседателот Стево Пендаровски, од Асоцијацијата на спортски обложувалници (АСОМ) ги повикуваат пратениците да кажат конечно и последно „против“ предлог-законското решение, исто како што тоа го сториле шефот на државата и Делегацијата на Европската Унија.
Оттаму ги повика пратениците да не го поддржат законот и да одговорат на барањата на АСОМ за отпочнување дебата преку која заеднички ќе се дојде до вистинско, како што велат, европско законско решение за уредување на оваа област, без притоа да се загрозува иднината на десетиците илјади вработени во овој сектор.
„Останува нејасна упорноста со која се турка носењето на овој закон, за кој и Делегацијата на ЕУ во Скопје забележа дека се носи со злоупотреба на европското знаменце, бидејќи конкретниот закон не е поврзан со усогласување со правото на ЕУ. Напротив, преку неправилното означување на законот со ЕУ знаме, се скратува јавната дебата за важни прашања. Неодговорно е под заштита на ЕУ знамето да се тврди дека ограничувањето на просторот, на кој можат да работат приредувачите на игрите на среќа, е со цел да се заштитат младите од лоши и несоодветни навики за нивната возраст. Преку оддалечувањето на нашите деловни простории на повеќе од 500 метри од основните и од средните училишта власта го олеснува патот за пристап на младината до нерегулираниот простор на игрите на среќа на црно, и ги штити приватните интереси на поединци“,
велат од Асоцијацијата на спортски обложувалници (АСОМ).
Со реакција за денешната закажана пленарна седница на која повторно ќе се гласа за предлог-законот за игри на среќа се јави и Асоцијацијата на приредувачи на игри на среќа (АПИС). И оттаму ги повикаа пратениците да не го гласаат законот велејќи оти тој нема никаква врска со тврдењата дека целта е заштита на младината и додаваат дека затворањето на легалните објекти за игри на среќа ќе предизвика далекусежни последици.
Инаку, шефот на државата Стево Пендаровски одлучи да не го потпише указот за законот за игрите на среќа и за забавните игри, кои предвидуваат нови цени за лиценците за обложувачниците, како и објектите во кои тие се лоцирани да бидат оддалечени повеќе од 500 метри од основните и средните училишта.
Правото претседателот да не потпише указ за прогласување закон е регулирано во членот 75 од Уставот. Според членот, доколку претседателот одлучи да не го потпише указот, Собранието повторно го разгледува законот и доколку тој биде усвоен со апсолутно мнозинство, односно ако за него гласаат мнозинство од вкупниот број пратеници – најмалку 61 – шефот на државата е должен да го потпише указот.