Организаторите денеска информираа дека е испратено барање до српското МВР да одобри протестен марш од собранието на Србија до Уставниот суд, а потоа и до стадионот Ташмајдан
Владата на Србија ѝ вети на Европската комисија дека парадата на „Европрајд“ ќе може да се одржи во сабота во Белград, пренесува новинската агенција Бета.
Единствено што ќе биде различно е тоа дека рутата на парадата „Европрајд“ ќе биде скратена.
Координаторот на „Европрајд“, Горан Милетиќ, денеска информира дека е испратено барање до МВР да одобри протестен марш од собранието на Србија до Уставниот суд, а потоа и до стадионот Ташмајдан, каде што ќе биде одржан концерт во 17 часот.
Тој на прес-конференција пред зградата на владата на Србија рече дека поднеле петиција со 27 000 потписи до владата со која бараат одржување на парадата во рамки на „Европрајд 2022“.
„Симболично ќе се собереме пред Уставниот суд, а потоа ќе продолжиме по булеварот Крал Александар, булеварот Београдска, булеварот Илија Гарашанин и потоа Ташмајдан“,
изјави Милетиќ.
Тој потсети дека првиот концерт се одржува вечерва во 18 часот.
Со кревање на знамињата на виножитото, пред Палатата на Србија, во понеделникот, официјално започна манифестацијата „Европрајд 2022“, која до недела ќе се одржува во Белград, кој е годинашен домаќин на паневропскиот настан.
„Европрајд“ е паневропски ЛГБТИ+ настан, кој се одржува секоја година во различен град во Европа. Според организаторите на настанот, белградскиот „Европрајд“ ќе биде историски затоа што е првпат да се одржува во некоја земја од Западен Балкан и воопшто во овој дел од Европа.
Досега овој настан привлече големо внимание во јавноста откако српскиот претседател Александар Вучиќ најави дека настанот ќе биде откажан од безбедносни причини.