Филипче апелираше граѓаните да не ги земаат овие лекови на своја рака, без претходна дијагноза и детални кардиолошки анализи
Неколкумина пациенти на Инфективната клиника веќе ја примаат комбинацијата на антималарик и антибиотик, која даде позитивни резултати во повеќе земји, информира министерот за здравство Венко Филипче додавајќи дека тие сите прво биле подложени на кардиолошки анализи, бидејќи комбинацијата од лекови е контраиндицирана за пациенти со одредени срцеви слабости.
Во тој контекст, министерот рече дека од вчера Македонија е примена и во една голема студија „Солидарити трајал“ на СЗО за избор на најефикасна терапија за пациенти со ковид-19, во која се вклучени повеќе земји каде што се анализираат различни пристапи во лекување, бидејќи сите терапии што сега се даваат се „оф лејбл“, односно во фаза на тестирање.
„Треба да се завршат клинички студии за лековите. Исто така, треба да се утврди кај кои пациенти може да се дава, согласно препораките на епидемиолозите и затоа тоа се прави само во болнички услови“,
потенцира Филипче.
Овој лек понатаму ќе се дава и на лицата кои се на домашно лекување, но тие ќе бидат транспортирани на Инфективната клиника, за што се изработува план. Но она што е најважно, сите што ќе бидат подложени на новата терапија мора претходно да имаат кардиолошки анализи за да се исклучи евентуална срцева слабост која не дозволува овие пациенти да примаат ваква терапија.
Затоа, тој уште еднаш апелираше до граѓаните да не земаат вакви лекови на своја рака бидејќи, како што рече, се работи за лек со сериозни несакани ефекти.