Според МВР, од вкупно 310 865 прекрошоци, колку што регистрирал системот „Безбеден град“ од февруари годинава до 20 август, 180 378 биле евидентирани кај возила со странски регистарски ознаки
Од МВР посочуваат дека во периодот од 19 до 20 август се регистрирани 5 514 прекршоци од страна на возила со таблички различни од домашните
Системот „Безбеден град“ (Safe City) од почетокот на неговото функционирање во февруари годинава, евидентирал вкупно 310 865 прекрошоци, од кои безмалку сите се за пречекорување на дозволената брзина на возење, информираа денеска од Министерството за внатрешни работи.
Според соопштението на Министерството, повеќе од половина од прекршоците, или точно 180 378 се евиндентирани кај возила со странски регистарски ознаки.
„Министерството за внатрешни работи ја известува јавноста дека во периодот од 02.02.2026 до 20.08.2026 во системот ‘Безбеден град’ евидентирани се вкупно 310 865 прекршоци, од кои најголем дел се однесуваат за управување на возило со брзина поголема од дозволената – 301 835 прекршоци“,
велат од МВР.
Кога станува збор за прекршоците што ги направиле возила со странски регистарски ознаки, од МВР посочуваат дека во периодот од 19 до 20 август се регистрирани 5 514 прекршоци од страна на возила со таблички различни од домашните.
„Во однос на прекршоците сторени од возила со странски регистарски ознаки, во периодот од отпочнување на функционирање на системот ‘Безбеден град’ регистрирани се вкупно 180 378 прекршоци, додека во периодот од 19.08.2026 до 20.08.2026 регистрирани се 5 514 прекршоци од возила со странски регистарски ознаки“,
се наведува во соопштението од МВР.
Оттаму апелираат до сите учесници во сообраќајот да ги почитуваат сообраќајните правила и прописи со цел заеднички придонес за безбедноста на патиштата.
Инаку, од средата (19 август) МВР почна со изрекување казни на странските возачи кои сториле сообраќаен прекршок додека поминувале низ територијата на државава.
Контролата почна да се спроведува на граничниот премин „Табановце“ на македонско-српската граница, на излез од државата, каде во системот се појавуваат возила со странски регистарски ознаки кај кои „Безбеден град“ претходно евидентирал сообраќајни прекршоци.
„На возачите им се соопштува дека е евидентиран прекршок и им се издава записник за сторен сообраќањен прекршок со прекршочен платен налог, со можност казната да ја подмират согласно законската постапка“,
соопштија на 19 август од МВР.
Ова доведе до метеж и зголемен број возила на граничниот премин, а од МВР рекоа дека тоа е поради тоа што станува збор за почеток од примената на овој механизам, при што се опфаќаат и претходно евидентираните прекршоци. Негативни реакции и негодувања за примената на механизмот дојдоа најмногу од државјаните на соседна Србија.
Од Министерството за внатрешни работи завчера информираа дека во функција е ставена нова веб-апликација, преку која странските возачи ќе можат брзо и едноставно да проверат дали имаат евидентирано сообраќајни прекршоци од системот „Безбеден град“, да добијат увид во издадените прекршочни платни налози и електронски да ги платат глобите.