Во рамките на кампањата се вакцинирани и 2 630 граѓани над 65-годишна возраст кои примиле вакцина против сезонски грип, а за нив е обезбедена и бивалентна ревакцина за ковид-19
Повеќе од 3 600 деца се вакцинирани или им е закажан термин за вакцинација во кампањата „Од врата до врата“, информираат од Министерството за здравство.
Во кампањата 30 медицински тимови посетиле 221 рурално место и 79 урбани населени места. Медицинските тимови, за месец и половина, посетиле вкупно 3 867 домови во кои има невакцинирани лица или лица заинтересирани за вакцинација.
Во рамките на кампањата, од Министерството за здравство велат дека се вакцинирани и 2 630 граѓани над 65 годишна возраст. Овие лица, кои не можеле да пристапат до пунктовите за имунизација, во нивните домови се вакцинирани против сезонски грип, а за нив е обезбедена и бивалентна ревакцина за ковид-19.
Тимовите при посетата ги информирале семејствата за придобивките од имунизацијата, а биле поделени и 7 500 информативни материјали.
Кампањата „Од врата до врата“ е на Министерството за здравство и Светската здравствена организација, со поддршка од Европската Унија.