„Ситуацијата останува нестабилна бидејќи свлечиштето продолжува бавно да се движи, што претставува постојана опасност и за спасувачките тимови и за преживеаните“, соопштиле од центарот за катастрофи
Повеќе од 2 000 луѓе се затрупани во лизгање на земјиштето во Папуа Нова Гвинеја кое речиси целосно уништи едно планинско село, соопшти денеска владата на земјата истовремено апелирајќи за меѓународна помош за пронаоѓање на исчезнатите, јавуваат светските агенции.
Планинско село во провинцијата Енга беше речиси збришано од падината кога дел од планината Мунгало се урна во петокот рано наутро затрупувајќи голем број домови и луѓе додека сè уште спиеле во нив.
„Свлечиштето затрупа повеќе од 2 000 луѓе и предизвика големо уништување куќи, ниви и предизвика големо влијание врз економскиот живот на земјата“, се вели во писмото од Папуа Нова Гвинеја до Обединетите нации“,
пренесува регионалниот сервис на Радио Слободна Европа (РСЕ) повикувајќи се на агенцијата АФП.
Од центарот за катастрофи соопштиле дека ситуацијата на теренот и натаму е опасна, а поради свлечиштето целосно е блокиран главниот пат што води до големиот рудник за злато „Поргера“.
„Ситуацијата останува нестабилна бидејќи свлечиштето продолжува бавно да се движи, што претставува постојана опасност и за спасувачките тимови и за преживеаните“,
соопштиле од центарот за катастрофи.
Дополнително, оттаму навеле дека ситуацијата бара итна и заедничка акција од сите служби, вклучително и од воените, националните и регионалните тимови за одговор.
Во писмото упатено до ОН, светската организација се повикува за ситуацијата да ги информира сите партнери и меѓународни пријатели на Папуа Нова Гвинеја за кризата. Во однос на испраќањето помош, пак, се наведува дека таа треба да биде координирана преку центарот за катастрофи на земјата.
Локалните жители и спасувачките тимови користеле лопати и парчиња дрва за да ги пронајдат телата на луѓето под свлечиштето. Станува збор за маса од камења со големина на автомобил, откорнати дрвја и земја, за која се смета дека е длабока до осум метри.
„Копнената маса сè уште се лизга, камења паѓаат од планината“,
изјавил за АФП претставникот на Агенцијата за миграција на ОН, Серхан Актопрак.
Според него, потоци вода течат меѓу земјата и нанесената маса, додека на земјиштето до свлечиштето почнале да се појавуваат пукнатини.
„Ова може да предизвика дополнително лизгање (на земјиштето)“,
предупредил тој додавајќи дека тоа претставува сериозен ризик и за спасувачите и за луѓето што живеат во областа.
Според локалните жители, лизгањето на земјиштето можно е да е предизвикано од обилните врнежи на дожд што ја зафатиле областа во изминатите неколку недели.
Папуа Нова Гвинеја има една од највлажните клими во светот, а истражувањата покажуваат дека промените во обрасците на врнежите поврзани со климатските промени може да го влошат ризикот од лизгање на земјиштето.