Во врска со цената, пак, од Министерството нагласуваат дека пациентите го купуваат со рецепт препишан од специјалист, а парите потоа им се рефундираат од ФЗО
Потрошувачката на „клексан“ е зголемена насекаде во светот, па и кај нас и тоа за три пати повеќе од вообичаено, но нема криза од негов недостаток, тврди Министерството за здравство.
„Со месеци наназад, компанијата која врши увоз на лекот резервираше поголеми количини и тие се дистрибуирани до сите болнички установи. Во меѓувреме, онаму каде што требаше, се даваше друга форма на хепарин. Криза во смисла на недостаток на ’клексан‘ нема, туку има зголемена потрошувачка“,
велат од Министерството за здравство.
Оттаму потенцираат и дека „клексанот“ се наоѓа на позитивната листа лекови, а се дава исклучиво под надзор на медицинско лице и може да се купи од аптека со рецепт од специјалист.
Информации во врска со состојбата со овој лек, Министерството споделува откако пратеникот од ВМРО-ДПМНЕ, Антонијо Милошоски, обвини дека Филипче „заборавил“ да го ставил лекот на позитивната листа и тои болните за него во земјава плаќаат по 60 евра, а во Германија чини само 10.
Во врска со цената, пак, од Министерството нагласуваат дека пациентите го купуваат со рецепт препишан од специјалист, а парите потоа им се рефундираат од Фондот за здравствено осигурување (ФЗО).
„Не добивме вакцина од ЕУ единствено поради недоволната испорака кај нив“
Обвинување и деманти на релација Милошоски-Министерство за здравство, има и во однос на набавката на вакцина.
Пратеникот обвинува за неспособност навремено да се обезбедат вакцини додека тоа не е случај со Србија, Албанија, Бугарија и Грција. Од Министерството, пак, велат дека Милошоски добро знае дека сите земји во светот се соочуваат со недоволни количини на вакцини, но свесно лаже и обвинува.
„Милошоски како поранешен министер за надворешни работи и актуелен претседател на собраниската комисија за надворешна политика многу добро ги знае приликите и водењето преговори со земјите од ЕУ. Милошоски знае и е свесен дека единствена причина поради која нашата земја не доби помош од европските држави кои ветија вакцини за нас од дозите кои ќе ги набават за сопствените земји е поради недоволната испорака на вакцини и кај нив. Сепак и покрај овие факти пратеникот одлучи да шири лаги по социјалните мрежи и да ги доведува во заблуда граѓаните на штета на нивното здравје и правејќи штета на целокупниот здравствен систем“,
велат од Министерството за здравство.