Доколку доказот биде дозволен од страна на Обвинителството, додава бранителот, доказите на Јавното обвинителство во целост ќе бидат елиминирани
Постојат докази дека обвинетиот Боре Видевски за време на критичниот период во кој се случуваат убиствата на Панче Жежовски и Вања Ѓорчевска бил на работа и тој исказ е даден во Обвинителството уште на 21 декември 2023 година, рече бранителот на Видевски, Бојан Манев, по денешното рочиште.
„Обвинетиот Боре Видевски не учествувал во ниту еден од двата кривично-правни настани. Зошто го тврдам тоа? Доколку го земете фактот дека Обвинителството досега пријави три моменти кои укажуваат на случување на кривичноправниот настан, убиството на Панче Жежовски. Најпрво, кога бевме во Обвинителство на ден 21 декември 2023 година, како време на случување на убиството на Панче Жежовски е вечерта на 22 ноември. Во обвинение е ставено девет часот сабајле на 22 ноември 2023 година, меѓутоа исказот на Велибор Манев кажува дека е на 23 ноември, исто така, сабајле“,
рече адвокатот.
Според него, грешка на Обвинителството е тоа што не ги дозволило снимките кои ги посочил сведокот Гоце Трајковски во неговиот исказ.
„Обвинителството згреши во една работа, односно што не ги дозволи снимките кои ги спомна сведокот Гоце Трајковски во неговиот исказ, коишто ги виде цела Македонија, од бензиската станица ‘Лукоил’ во близина на Велес. Доколку ги погледнете тие снимки внимателно, ќе видите дека тие снимки се од 12 часот на 22 ноември 2023, што значи во тој момент Панче Жежовски е жив, бидејќи се гледа на самите снимки“,
рече адвокатот.
За снимките од куќата на Велибор Манев, каде што се гледа и неговиот клиент Видевски, рече дека не се од тој ден, односно не соодветствуваат со денот 21 ноември 2023 година, којшто се наоѓа на тие снимки.
Тој вели дека „Обвинителството треба најпрво да расчисти со себе и со своите изведени докази“ и додаде дека денес е побарано изземање на самото Обвинителство поради еден од тие докази што е прибавен по завршувањето на истрагата и му е дозволено на Обвинителството да го изведе, иако тоа било по завршувањето на истрагата.
„Се работи за предметните снимки од куќата на Велибор Манев за коишто ние како одбрана тврдиме дека не се од тој ден, односно не соодејствуваат со ден 21 ноември 2023 година како момент којшто се наоѓа на тие снимки, односно датум којшто го пишува на тие снимки, додека одбраната на обвинетиот Љупчо Палевски со доказ тврди дека предметното ‘рено кангу’ не се наоѓа во тој момент во куќата на Велибор Манев“,
вели бранителот на Видевски.
Доколку доказот биде дозволен од страна на Обвинителството, додава бранителот, доказите на Јавното обвинителство во целост ќе бидат елиминирани.
Во врска со сведочењето на обвинетиот Велибор Манев, кој ги призна делата и го посочи Боре Видевски како еден од сторителите, бранителот на Видевски рече дека тоа го знае уште од почетокот на оваа расправа бидејќи, како што рече, како адвокат имал увид во исказите.
„Не би го коментирал никако. На крајот ќе има соочување и сметам дека не ја зборува вистината“,
рече Манев.
Нагласи дека Обвинителството нема повикано ниту еден од колегите на Боре Видевски како сведок дека обвинетиот се наоѓал на работа за време на критичниот период, иако, како што рече, работа на Обвинителството е да го провери секој предметен исказ којшто ќе го даде обвинет.
„Во Обвинителството беа посочени сведоци што работат со него во канцеларија. Работа на Обвинителството е секој предметен исказ којшто ќе го даде обвинет да го провери, а Обвинителството го нема тоа направено. На исказ во Обвинителство на 21 декември 2023 година се посочени лица кои што работат со него и коишто се наоѓаат во канцеларија со него на 22 ноември, денот којшто беше потврден како ден на извршување на убиството на Панче Жежовски“,
рече Манев.
На денешното рочиште Боре Видевски, третообвинетиот за грабнувањата и убиствата на Вања Ѓорчевска и Панче Жежовски, негираше каква било вмешаност во двата грозоморни настани. Неговиот исказ следуваше по долгиот распит на Велибор Манев пред судот, кој траеше три рочишта и на кои изнесе детали за грабнувањата и убиствата, напоменувајќи ја и улогата на Видевски во нив.
Видевски одговараше на директни прашања на неговиот адвокат Бојан Манев. Рече дека со Велибор Манев се знаеле одамна, а комуникацијата се интензивирала откако се приклучил на партијата Десна. Тогаш ги запознал и другите. На прашање каде биле деновите 21, 22 (кога е убиен Жежовски) и 23 ноември 2023 година, Видевски одговори – на работа.
Она што кажал, како што рече, го кажал бидејќи бил тепан во полициска станица. Бил уапсен на 3 декември 2023 година и за кратко време префрлен од Велес во полициска станица во Скопје. Тој дел од исказот го посвети на споделување детали за тоа како бил тепан во полициската станица за да го признае делото.
По директното испрашување на неговиот адвокат, тој одговараше на вкрстени прашања на обвинителките Жаклина Крстевска-Јосифовска и Ана Стојковиќ-Димитровска. На прашањата на обвинителките дека тој воопшто не се пожалил дека бил тепан, Видевски рече дека тоа било од страв. Прашан дали е точно дека од оружјето што го поседува недостига само пиштолот, рече дека било набавено во време кога било престиж да се поседува. Рече дека има аверзија кон оружје. За пиштолот кажа дека не знае каде е, можеби е преместен одамна. Рече дека тоа не значи дека направил нешто лошо.
