Портпаролката на Европската комисија, Дана Спинант, одби да даде прецизен одговор дали Европската Унија го признава македонскиот јазик. Одговарајќи на новинарско прашање на дописничката на МИА во Брисел, Тања Милевска, Спинант рече дека вчера претседателката на ЕК, Урсула фон дер Лајен, говорела за „јазикот што го користат луѓето во Северна Македонија“.
„Изјавата на претседателката значи тоа што значи. Таа зборува за јазикот користен од луѓето во Северна Македонија, што таа го нарекува македонски јазик. За импликациите што ова ќе го има за нешто што е повеќе техничко како, на пример, Договорот за Фронтекс, ќе прашам. Проверував за да видам дали има нешто ново, но нема. Ќе проверам дали има нешто ново и дополнително ќе ве информирам, сега засега нема ништо ново“,
рече Спинант.
На дополнително прашање дали вчерашната изјава на Фон дер Лајен значи дека Европската комисија го признава јазикот како македонски, Спанинг рече дека не сака да се впушта во интерпретација на сите синоними во изјавите на претседателката на ЕК.
Вчера претседателката на ЕК, Урсула фон дер Лајен, во македонското Собрание рече дека во францускиот предлог именувањето на јазикот е како „македонски“ без какви било одреденици од страна на ЕУ.
Претставниците на власта во Македонија изјавата на Спанинг ја карактеризираат како непрофесионален гаф. Националниот координатор за Отворен балкан и регионални иницијатива, Марјан Забрчанец, вели дека овој гаф предизвикува вознемиреност кај македонскиот народ и побара корекција.
„Европската комисија мора веднаш да се корегира после ваквите изнесени невистини и да преземе мерки против ваквото неодговорно однесување на портпаролка која неподготвена излегла да зборува спротивно од фактите и спротивно од нејзината претпоставена“,
вели Забрчанец во објава на Фејсбук.