Мерките што ги донесе Владата ќе важат од утре до следниот четврток, 18 јули
Поради тополотниот бран што ја зафати земјава, активно е портокалово ниво на опасност од високи температури.
Владата на денешната седница донесе препораки според кои, од утре до следниот четврток, 18 јули, бремените жени и лицата на возраст над 60 години се ослободени од работните обврски, децата во градинките не смеат да имаат физички активности и да се изнесуваат на отворено од 11 до 17 часот, приватниот сектор треба да го организира работното време со цел заштита од директна сончева изложеност на работниците, а се препорачува и избегнување престој на отворено од 11:00 до 17:00 часот.
Единиците на локалната самоуправа, Црвениот крст и центрите за социјални работи во регионите зафатени со топлотниот бран, да им даваат помош на осамени, стари, изнемоштени лица и бездомници.
„Со оглед дека одредени ризични производствени и технолошки процеси може да претставуваат дополнителен ризик за здравјето на изложените работници, се потсетуваат работодавците на обврската за почитување на законските прописи од оваа област“,
се вели во препораките од Владата кои се донесени на денешната онлајн седница.
Од Управата за хидрометеоролошки работи (УХМР) најавуваат дека под влијание на топол бран утре ќе се задржи сончево и многу топло време, во поголемиот дел од земјава со температури над 35 Целзиусови степени, а на некои места таа ќе надмине и над 42 Целзиусови степени.
Од Итната медицинска помош велат дека овие денови, поради топлото време, имаат зголемен број интервенции при колапси на јавни места кои им се случуваат и на помлади и на повозрасни граѓани.