Директорот на Казнено-поправната установа „Идризово“, Зоран Јовановски, во изјава за порталот „Сдк.мк“ вели оти таа треба редовно да се јавува во Основниот кривичен суд Скопје додека не ѝ истече казната во целост
Поранешната шефица на Специјалното јавно обвинителство (СЈО), Катица Јанева, која беше осудена во случајот „Рекет“ за злоупотреба на службената положба и овластување на седумгодишна затворска казна, на почетокот на неделата добила условен отпуст и го напуштила затворот „Идризово“, пренесе „Сдк.мк“. Директорот на КПУ „Идризово“, Зоран Јовановски, ја потврдил информацијата и изјавил оти таа треба редовно да се јавува во Основниот кривичен суд во Скопје, додека не ѝ истече во целост седумгодишната казна.
Пресудата за случајот „Рекет“ Основниот кривичен суд Скопје ја изрече на 18 јуни 2020 година, а правосилна стана кон крајот на јули следната година, откако Апелацискиот суд Скопје по повеќе од една година ја потврди пресудата на првостепениот суд. За одлуката Апелација информираше преку соопштение на 21 јули 2021 г., а два дена подоцна Јанева беше спроведена во затворот „Идризово“ на отслужување на казната.
Во случајот „Рекет“, покрај Јанева, затворска казна доби и Бојан Јовановски – Боки 13 во времетраење од девет години, за делата примање награда за противзаконито влијание и за перење пари, додека пак Јанева беше осудена за злоупотреба на службената положба и овластување. Јовановски, кон крајот на 2023 година, му беше прекинато издржувањето на затворската казна поради здравствената состојба во која се наоѓа.
Во јануари минатата година, Јанева доби дозвола за работно да биде ангажирана надвор од затворот во адвокатската канцеларија на својот син, а по доаѓањето на Александар Пандов на директорската позиција во Управата за извршување на санкции, таа го загуби ова право, оти при проверка било утврдено дека Јанева не ги почитувала условите.