Како што соопшти МВР, во текот на месецов марихуаната била набавена преку фирмата и потоа била сместена во објект на компанијата. Но вчера дел од пратката преку контејнер завршила на депонија во Кочани
Полицијата заплени 238 килограми марихуана, вредна над 400.000 евра во Кочани, а приведен е и 39-годишен бугарски државјанин со иницијали С.В.К. Акцијата се случила вчера, а денеска СВР Штип до Јавното обвинителство во Кочани поднесе кривична пријава против правен субјект и бугарскиот државјанин кој се јавува како управител на фирмата. Правниот субјект ќе се товари за производство на канабис, а бугарскиот државјанин за „неовластено производство и пуштање во промет наркотични дроги, психотропни супстанци и прекурсори“.
Како што соопшти МВР, во текот на марихуаната била набавена преку фирмата и потоа била сместена во објект на компанијата. Но вчера дел од пратката преку контејнер завршила на депонија во Кочани.
„Вчера дел од истата е префрлена во контејнер за отпад, односно во специјално товарно моторно возило за собирање смет, сопственост на Комуналното јавно претпријатие „Водовод“ од Кочани, за да потоа биде оставена на депонијата во Кочани, од каде непознати лица ја земале за понатамошно неовластено пуштање во промет, со цел стекнување на противправна имотна корист.“,
велат од МВР.
Заплената е направена вчера од страна на Одделот за сузбивање на организиран криминал во простор на правниот субјект од Кочани откако возило за собирање на отпад во сопственост на „КЈП Водовод – Комунална хигиена“ влегла во дворот на објектот. Работници од претпријатието механички ја истуриле содржината на контејнерот за смет во камионот, а потоа возилото било сопрено од полициски службеници.
„Притоа од извршениот преглед на товарното моторно возило утврдено е дека во внатрешноста на товарниот дел има поголема количина на марихуана. Пронајдената и одземена марихуана врз основа на издадена Наредба од ОЈО Кочани, предадена е во Одделот за криминалистичко-технички испитувања и вештачења при МВР на РСМ.“,
велат од МВР.
Дрогата е однесена на вештачење и утврдено е дека станува збор за 237 килограми и 970 грама. Вредноста на марихуаната МВР ја проценува на над 400.000 евра.