Случајот се заснова на телефонскиот повик на Трамп на 2 јануари 2021 година со највисокиот изборен функционер во Џорџија, Бред Рафенспергер, барајќи од него да „најде“ доволно гласови за да го поништи неговиот тесен пораз во државата, што Рафенспергер одби да го направи
Поранешниот американски претседател Доналд Трамп се соочи со четврта кривична пријава откако големата порота во Џорџија го обвини за обид да влијае на изборите во 2020 година, на кои беше поразен од демократот Џо Бајден.
Обвиненијата, поднесени од окружната обвинителка на САД, Фани Вилис, се најнови правни проблеми за Трамп, фаворит во трката за претседателска номинација на Републиканската партија во 2024 година. Обвинителите истакнаа 11 точки од обвинението против Трамп и неговите соработници, вклучително и фалсификување и рекетирање, кои вообичаено се користат против членови на организирани криминални групи.
Тие обвинија 18 други лица, меѓу кои Марк Медоус, поранешен шеф на кабинет на Трамп во Белата куќа, и адвокатите Руди Џулијани и Џон Истман.
Случајот се заснова на телефонскиот повик на Трамп на 2 јануари 2021 година со највисокиот изборен функционер во Џорџија, Бред Рафенспергер, барајќи од него да „најде“ доволно гласови за да го поништи неговиот тесен пораз во државата, што Рафенспергер одби да го направи.
Четири дена подоцна, на 6 јануари 2021 година, и две недели пред Трамп да ја напушти Белата куќа, неговите поддржувачи упаднаа во американскиот Капитол во неуспешен обид да ги спречат конгресмените да ја потврдат победата на Бајден.
„Ми изгледа наместено“
Трамп го критикуваше најновото обвинение кое го товари за обид за манипулација на претседателските избори во 2020 година во државата Џорџија.
„Ми изгледа наместено. Зошто не поднесоа обвиненија пред две и пол години? Затоа што сакаа да го направат тоа среде мојата политичка кампања. Лов на вештерки!“,
одговори Трамп во порака објавена на неговата социјална мрежа Truthsocial.
Тој веќе има три кривични дела
Трамп веќе се изјасни за невин по три кривични пријави. Тој се соочува со судење во Њујорк, кое ќе започне на 25 март следната година, во врска со исплата на пари за замолчување на една порноактерка и судење во Флорида, кое ќе започне на 20 мај, за незаконско чување на доверливи документи.
Третото обвинение, поднесено против него во Вашингтон, го товари за незаконски обид да го оспори неговиот пораз на изборите во 2020 година, а датумот на судење сè уште не е одреден. Џорџија, некогаш претежно републиканска држава, стана една од неколкуте држави кои одлучуваат за исходот на претседателските избори.
Трамп и понатаму изнесува лажни тврдења дека победил на изборите во ноември 2020 година, иако десетици тужби и владини истраги не нашле докази за поддршка на тие тврдења.