Со дозволата за работа се предвидувало отпадна гума и пластика да се горат во затворен процес, но при надзорот е констатирано дека емисиите од согорувањето слободно се испуштаат во атмосферата
При такви процеси вообичаено се испуштаат канцерогени гасови (фурани и диоксини), кои делуваат на повеќе органи и предизвикуваат трајни последици, посочуваат од Државниот инспекторат за животна средина
Државниот инспекторат за животна средина информира дека констатирал низа пропусти при надзор на работата на погон за горење гуми и пластика во близина на Штип, кој не работел согласно дозволата за работа.
Со надзорот се констатирало дека погонот не ги применува одредбите од дозволата за работа во ниеден аспект од технилошкиот процес, па инспекторатот поднел предлог до Општина Штип за одземање на Б интегрирана дозвола на погонот „САНС-АГ“ увоз-извоз ДООЕЛ ШТИП.
Надзорот бил спроведен пред два дена по преставка на Министерството за одбрана за да се утврди влијанието врз лицата што престојуваат во воените објекти: стрелиште Пенуш и полигон Криволак.
Од Инспекторатот велат дека ова е нивна втора преставка. Првата била поднесена на крајот на септември, но како што велат, никој не презел ништо, ниту информацијата била пренесена до новата ВД директорка Ана Петровска.
„Локацијата на објектот се наоѓа во атарот на градот Штип, во поранешна вoена база на КФОР, на оддалеченост од 8,5 километри од центарот на градот и 2 км од селото Пенуш. На надзорот беше констатирано дека не се применуваат одредбите утврдени со Б интегрираната дозвола во ниеден аспект од технолошкиот процес, видот на постројката или начинот на складирање на суровините и готовиот производ“,
се вели во соопштението.
Со дозволата за работа се предвидувало отпадна гума и пластика да се горат во затворен процес при што доаѓа до хемиско раложување и добивање течна фракција – нафта и цврст остаток, а не се врши емисија во воздухот, поради применет систем за ладење. Била предвидена постројка што спаѓа во најдобри достапни техники, со систем за автоматска декомпресија, автоматско празнење на талог и безопасни и незагадувачки продукти.
Но, при надзорот било утврдено дека инсталацијата не е целосно изведена, процесот не е затворен, а емисиите од согорувањето на гуми и пластика слободно се испуштаат во атмосферата.
„При такви процеси вообичаено се испуштаат канцерогени гасови (фурани и диоксини), кои делуваат на повеќе органи и предизвикуваат трајни последици. На локацијата беше видливо дека складирањето на готовиот производ и суровините не се врши на соодветен начин. Течното гориво добиено од горење на гумите се чуваше во цистерни на пелети, наместо да се чува на водонепропусна подлога, што истовремено ќе обезбеди доволен волумен за собирање на потенцијално излеана течност. Пепел од согорувањето, што потенцијално содржи токсични материи, беше собран во џамбо вреќи и складиран на земја во локацијата. Управиителот на објектот информираше дека локацијата на која се врши складирањето на суровини и отпад е во процес на легализација. Поради сите утврдени пропусти, Државниот инспекторат за животна средина даде Предлог до општина Штип (која ја издала дозволата) за одземање на Б интегрирана дозвола на погонот за горење гуми и пластика „САНС-АГ“ увоз-извоз ДООЕЛ ШТИП“,
се вели во соопштението на Државниот инспекторат за животна средина.